Pau: se tendrà un festenal contra l’òdi e en favor del mescladís

Lo 19 de mai que ven, la lucha contra l’individualisme e la valor de partejar amb los autres marcaràn una jornada que se clavarà amb un concèrt de la banda palesa d’hardcore Black Sugar

Aurà luòc lo 19 de mai que ven a Pau un festenal contra l’òdi e en favor del mescladís. Nomenat Mai-Sclat, l’eveniment portarà al quartièr palés del Hedars una discussion a l’entorn de la mesa en valor de la diversitat e de la lucha contra l’individualisme, que se clavarà amb un concèrt del grop de musica hardcore garatge Black Sugar.

 

Organizat per la còla de Libertat e La Tor deu Borrèu, lo festenal a la tòca de “lutar contra l’individualisme e l’arrèrpè sus si”, mai que mai en aquestes tempses complicats “qu’ei mei que mei important de non pas estar devesit e que cau aprener e e partejar damb los autes”.

 

 

25 ans de la Tor deu Borrèu

 

Aquel eveniment se ten dins l’encastre de las celebracions del 25n anniversari de la Tor deu Borrèu. Long de l’annada i aurà d’autres eveniments “tà hestejar e celebrar la luta, la resisténcia, la vita dens aqueste lòc”.

 

Long d’aquestas 25 annadas, la Tor deu Borrèu s’es consolidada coma un endrech de referéncia ont los joves i an trobat un luòc de luchas socialas e politicas. Mas, al delà de l'engatjament politic, çò mai important de La Tor deu Borrèu es que s'agís d'un estanquet ont se pòt parlar la lenga e ont la cultura del país a una plaça per s'exibir sens cap de complèxe, ont de joves e de vielhs pòdon trencar amb la solesa de cada jorn per tornar trobar lo gaug de partejar un veire, una musica o una experiéncia.

 

— Vesitatz la pagina Facebook de l’eveniment.

 

— En seguida podètz escotar los Black Sugar:

 

 

[Poblejat dins www.jornalet.com]