Lo president del Brasil auriá crompat lo silenci d’un èx-politician empresonat

Segon O Globo, lo president Michel Temer auriá crompat lo silenci de l’èx-president de la cambra dels deputats, Eduardo Cunha, en preson per l’afar Lava Jato

Los proprietaris de JBS, la principala societat de carn de Brasil, an assegurat davant lo Ministèri Public qu’enregistrèt lo president, Michel Temer, en autorizant de crompar lo silenci de l’èx-president de la cambra dels deputats, Eduardo Cunha, après èsser embarrat en preson per l’afar Lava Jato.

 

Segon lo jornal O Globo, l’entrepreneire Joesley Batista liurèt un enregistrament al Ministèri Public que ditz a Temer qu’aviá donat d’argent a Eduardo Cunha e a l’operator financièr Lúcio Funaro per que foguèsson en silenci dins la preson. Davant aquela informacion, Temer dins dins l’enregistrament: “aquò o te cal manténer, d’acòrdi?”

 

Cunha es encarcerat dins la preson de Curitiba. Lo detenguèron en octòbre passat a Brasília, acusada d’aver recebut de subornacions per una valor de cinc milions de dolars en contrapartida de dos contractes per la construccion de dos vaissèls per la societat estatala de petròli.

 

 

L’escàndol de Petrobras 

 

Michel Temer es acusat de recebre d’argent negre per finançar sas campanhas electoralas, e d’èsser gratificat per divèrsas societats tocadas per l’escàndol de Petrobras, un ret de corrupcion que prenguèt illegalament 2 miliards de dolars de la societat estatala de petròli. Aquela enquèsta tòca tanben lo president del Senat, Renan Calheiros, e lo president de la Cambra dels Deputats, Rodrigo Maia.

 

Los tres politicians refusan las acusacions. Pasmens, dempuèi junh passat, una còla d’avocats son a elaborar una proposicion de lei anticorrupcion que cèrca de distinguir entre “recebre d’argent negre” e “recebre de gratificacions”. A l’ora d’ara, la lei es pauc clara dins aquel sens, e diferenciar los dos delictes desliurariá dos centenats de parlamentaris de las acusacions portadas per l’enquèsta.

 

L’enquèsta es coneguda coma l’operacion Lava Jato, per tant popularament òm apèla aquela proposicion “l’amnestia de Lava Jato”.

[Poblejat dins www.jornalet.com]