terça-feira, 23 de maio de 2017

Lo festenal de cinèma de Canas festeja son 70n anniversari

Dempuèi dimècres passat e fins a dimenge que ven, la vila provençala de Vencenc aculhís un dels festenals pus prestigioses del Mond, creat en 1939

A luòc dempuèi dimècres passat, 17 de mai, lo festenal de cinèma de Canas (Vencenc), qu’ongan festeja son 70n anniversari. L’eveniment comencèt amb lo passatge sul tapís roge de las actrises mai internacionalas del cinèma francés, Marion Cotillard e Charlote Gainsbourg, que son las protagonistas del filme qu’inaugurèt l’edicion d’ongan: Les fantômes d’Ismaël. De mai, sus aquel celèbre tapís marchèron d’actors e de directors fòrça coneguts coma Clint Eastwood, Michael Haneke o Nicole Kidman.
 
Eastwood i faguèt un parladís sus sa longa carrièra a prepaus de las dificultats que rescontrèt al començament e de son filme de culte Unforgiven (Imperdonable). Haneke, qu’a ja ganhat doas Palmas d’Aur al festenal provençal, poiriá ongan ganhar sa tresena amb son nòu filme Happy End (Fin Aürosa).
 
 
De polemicas amb Netflix
 
Mas Canas a començat ongan amb una polemica inedita. La plataforma de television Netflix i a presentat dos filmes, que solament los farà veire a travèrs de sa plataforma. D’esplechaires de cinèma de tot l’estat francés planhon que lo festenal aculhisca de filmes que se poiràn pas mostrar dins las salas de cinèma. Tanben lo president de la jurada, Pedro Almodóvar, se manifestèt dins aquel sens. “Las nòvas plataformas devon assumir e acceptar las nòrmas ja existentas”, çò diguèt lo realizaire espanhòl dins sa conferéncia de premsa a l’inauguracion de l’eveniment. “Seriá per ieu una granda paradòxa que la Palma d’Aur d’aqueste festenal de Canas, e quin autre prèmi que siá, se poguèsson pas veire dins las salas de cinèma”, çò precisèt.
 
E mai se l'organizacion del festival a ensajat de negociar amb Netflix fins al darrièr moment, a pas atench un acòrdi. Per aquela rason a anonciat qu’a partir de l’an que ven, las condicions seràn mai claras: i poirà pas participar cap de filme que se pòsca pas veire dins los cinèmas.
 
Creat en 1939, lo Festenal Internacional de Cinèma de Canas es un dels mai prestigioses del Mond. Cada an se ten a la fin del mes de mai dins la vila provençala de Vencenc, e ongan se debana del 17 al 28 de mai.
 






 
 

[Imatge: L. VENANCE / AFP / Festival de Cannes - poblejat dins www.jornalet.com]

Nenhum comentário:

Postar um comentário