La campanha de l’eleccion presidenciala francesa es venguda un vertadièr vaudevila. Lo primièr torn serà dins mens de dos meses e los dos candidats màgers son tocats per d’escàndols de corrupcion. En mai d’aquò, la reaccion dels candidats es de se pretendre de victimas de maquinacions politicas o mediaticas. Fillon se ditz victima d’un “assassinat politic” del temps que semblariá que se vòl suicidar a la faiçon dels kamikazes e que pèrd de mai en mai de sostens. De son latz, Le Pen, dins lo pus blos estil faissista, contèsta la justícia e gausa quitament menaçar los jutges, se ven presidenta.
La situacion es inedita perque tòca los dos candidats màgers de la corsa a l’Elisi. Mas corrupcion e marridas practicas d’aquela mena son pas raras dins la politica francesa. “Los conflictes d’interès, lo nepotisme, las pòrtas giratòrias, los emplecs simultanèus dins las entrepresas privadas e lo sector public, son de practicas abitualas”, çò assegura lo sociològ Nicolas Framont dins son libre Los candidats del sistèma[1], que pareisserà lo 14 de març que ven.
Fillon ganhèt la primària amb un discors de superioritat morala davant Juppé e Sarkozy, qu’èran tocats per d’afars de corrupcion. En mai d’aquò, Fillon preconizava l’austeritat per los paures, la reduccion de la despensa publica e l’eliminacion de 500 000 emplecs publics. L’indignacion sociala es, doncas, plan logica.
Le Pen es determinada a profechar de l’espelida del populisme. Coma se passèt als Estats Units amb l’eleccion de Trump, un fum de ciutadans indignats vòlon quicòm de diferent dels politics abituals. Aquò Marine Le Pen o sap e se’n servís per promòure son discors ultrafrancista, supremacista e racista. E se sèm pas capables de bastir de politicas alternativas progressistas, aquel populisme talament pròche del modèl faissista aurà de mai en mai de poder, e nos sarrarem d’una situacion semblabla a las dels ans 1930, tornarmai coma consequéncia d’una crisi economica.
[Imatge: Britchi Mirela - poblejat dins www.jornalet.com]
Sem comentários:
Enviar um comentário