Lo francés es lenga obligatòria pels trabalhadors de trabalhs publics del nòrd-èst d’Occitània

La region Auvèrnhe-Ròse-Alps a introduch la nomenada clausa Molière. Lo prefècte la jutja illegala

Laurent Wauquiez decidiguèt d’introduire
la clausa Molière, qu’obliga los
trabalhadors dels talhièrs de
trabalhs publics de parlar francés 

Lo francés es ara una lenga obligatòria e impausada a totes los emplegats dels trabalhs publics en Auvèrnhe, Velai, Vivarés, Daufinat... e totas las encontradas que se tròban dins la region nomenada Auvèrnhe-Ròse-Alps. Es atal dempuèi decembre passat, que lo president regional, lo republican Laurent Wauquiez, decidiguèt d’introduire la clausa Molière, qu’obliga los trabalhadors dels talhièrs de trabalhs publics de parlar francés. Lo prefècte la jutja illegala.

 

Wauquiez, vòl, amb aquela clausa, empedir que las entrepresas engatgen al país de trabalhadors temporaris mandats per una entrepresa d'un autre estat de l’Union Europèa, e que los estrangièrs candidaten a las ofèrtas de mercat public de la region occitanoarpitana.

 

 

Oposicion del prefècte

 

Mas lo prefècte, Michel Delpuech, crei que s’agís d’una mesura discriminatòria, e li adreicèt lo 24 de febrièr un “recors graciós”. Delpuech estima qu’aquela clausa es illegala e daissa dos meses a Wauquiez per modificar los ponches litigioses o retirar la deliberacion. “Aquesta clausa, susceptibla de crear una discriminacion fondada sus la nacionalitat de las entrepresas candidatas, es contrària als principis constitucionals de libertat, d’accès a la comanda publica e d’egalitat de tractament dels candidats”, çò assolida lo prefècte, segon Rue 89 Lyon.

 

 

De sancions

 

La clausa prevei tanben de sancions pels que s’exprimirián pas en francés, impausadas per d’agents territorials que se rendràn suls talhièrs per contrarotlar l’emplec de la lenga dicha de Molière, que pasmens parlava occitan. De sancions que lo prefècte remarca que “son pas prononciadas per l’autoritat administrativa competenta demest las qualas figura pas la region”.

 

 

Wauquiez pensa pas de recular

 

De tot biais, lo cabinet de Wauquiez afirma que “se modificarà pas aquela deliberacion e la retirarem pas, es un tribunal que dirà se per cas o cal far”. En mai d’aquò, precisa que “se cal anar davant lo tribunal administratiu, i anarem”.

[Imatge: Alesclar - poblejat dins www.jornalet.com]