quarta-feira, 8 de março de 2017

La Val d’Aran festeja lo mes del caviar

Elaborat en Aran, aqueste produch de nauta qualitat serà lo protagonista dels principals restaurants del país durant lo mes de març. D’autras activitats son tanben prepausadas


Aqueste mes de març, Aran festeja lo mes del caviar en tot far promocion d’un produch de luxe e de nauta qualitat elaborat al país. Dins aquel sens, entre lo 3 e lo 23 de març, onze restaurants araneses an previst de prepausar de menuts ont lo caviar jogarà un ròtle màger, tant dins los plats coma dins los dessèrts. “Damb aguest tipe d’eveniment çò que volem ei potenciar eth torisme gastronomic damb productes elaboradi ena Val d’Aran”, çò assolidèt Anna Díaz, conselhièra dels torisme e desvolopament economic d’Aran.
 
Los restaurants que i participan son: Era Mòla (Vielha), Eth Triton (Arties), Roc’n’Cris (Aubèrt), Er Occitan (Bossòst), Era Coquèla (Vielha), Eth Bistro (Vielha), Gin Loe (Vaquèira), AC Hotels (Vaquèira), Es Arraïtzes (Garòs), La Fonda (Vielha) e Pirineu Gourmet (Arties).
 
En mai d’aquò, lo mes del caviar prevei d’autras activitats coma de vesitas a l’usina de caviar de Les per ne conéisser l’istòria e lo procès d’elaboracion, de tastas a la botiga de Vielha e de tractaments termals elaborats amb de caviar a las tèrmas de Les.
 
Lo caviar aranés es produch per la societat Nacarii de faiçon artisanala e a obtengut la reconeissença de cosinièrs e de gastronòms de pertot gràcias a sas sabor, frescor, puretat e transparéncia.
 



[Poblejat dins www.jornalet.com]

Nenhum comentário:

Postar um comentário