Jean-Luc Mélenchon en favor d’un referendum en Catalonha e Aran

Ditz qu’es contra l’independéncia, mas crei que “lo pòble de Catalonha se deu poder exprimir”

Lo candidat a l’eleccion presidenciala francesa, Jean-Luc Mélenchon, es en favor d’un referendum independentista en Catalonha e Aran. Lo cap del movement nomenat  França Insomesa ditz qu’es contra l’independéncia, mas crei que “lo pòble de Catalonha se deu poder exprimir”, çò rapòrta Equinox Radio, una ràdio d’expression francesa qu’emet de Barcelona estant.

 

Lo pòrtavotz de Mélenchon, Djordje Kuzmanovic, precisèt dins aquela emission que lo programa electoral del candidat francoesquerrista compren tanben un referendum d’autodeterminacion per la Nòva Caledònia en 2018.

 

 

Enemic de las lengas autras que lo francés 

 

Aquela anóncia es susprenenta, mai que mai, en vesent l’enemistat del candidat devèrs las lengas de l’estat autras que lo francés, mal nomenadas “regionalas”.

 

En genièr de 2014, Mélenchon mandèt una letra als deputats de l’Assemblada francesa per que votèsson contra la ratificacion de la Carta Europèa de las Lengas Regionalas o Minoritàrias.

 

Demest d’autres arguments, avertisssiá que la Carta podiá permetre de proceduras en lengas “regionalas” davant las autoritats judiciàrias, e un emplec d’aquelas lengas dins la vida publica en general, çò que per el seriá un vertadièr desastre. “De testimoniar, perseguir en justícia, signar de contractes dins una autra lenga que la francesa constituiriá una reculada per rapòrt a l’ordenança de Villers-Cotterêts que representèt una avançada fondamentala dins l’egalitat dels franceses davant la justícia e lo servici public”, çò disiá.

[Imatge: Place au peuple - poblejat dins www.jornalet.com]