Rugbi: Anderson canta l’imne de Catalonha en dirècte sus France Bleu

Lo jogaire neozelandés ditz que se sent catalan d’adopcion dempuèi qu’arribèt en çò dels Dragons, e apren lo catalan

Louis Anderson, lo jogaire de rugbi neozelandés, installat en Catalonha dempuèi que jòga amb los Dragons Catalans, a cantat l’imne catalan Els Segadors en dirècte sus France Bleu Roussillon, davant los fans de l’esquipa de rugbi catalana.

Anderson se sent catalan d’adopcion dempuèi qu’arribèt en çò dels Dragons —çò rapòrta France Bleu— e s’es totjorn volgut impregnar de la cultura catalana pel biais de pairinatges d’escòlas, per son contacte amb los suportaires, sas vesitas de las escòlas de rugbi de vilatges, e sustot, per l’aprendissatge de la lenga catalana.

En junh de 2015, lo jogaire cantèt lo refranh dels Segadors en dirècte sus aquela ràdio. Alavetz seguiguèt l’eveniment en interpretant l’imne sus un disc amb Albert Bueno.

E dimenge passat, dins una emission en dirècte de l’estadi Gilbert-Brutus de Perpinhan estant, Anderson respondèt a la convidacion de France Bleu en tot entonant l’imne catalan, aqueste còp entièr. “Pas marrit per un anglofòn”, çò concluguèt lo jogaire. Los suportaires semblavan plan contents.

 

[Poblejat dins www.jornalet.com]