sábado, 11 de fevereiro de 2017

Mila ans d’una lenga e d’una cultura

Carcassona aculhís un cicle de conferéncias, projeccions e recitals a l’entorn d’una exposicion sus la lenga occitana e son istòria, del 14 de febrièr al 30 de junh
Los Archius departamentals d’Aude, en collaboracion amb l’Institut d’Estudis Occitans (Aude), organizan un cicle de conferéncias, de projeccions de films e de recitals a l’entorn de la mòstra presentada dins los locals dels Archius del 14 de febrièr al 30 de junh de 2017 (dobèrta al public del diluns al dijòus de 8h30 a 17h30 e lo divendres de 8h30 a 16h30)

L’estrena se farà aqueste dimars 14 de febrièr a 6 oras del vèspre. Aprèp los discorses, los afogassets e los vins del país, lo Mans de Breish cantarà.
La mòstra
Los panèls de la mòstra son presentats en dobla version: francés e occitan.
Lengadòc ièr, “Occitània” uèi: la contrada ten son nom, dempuèi sègles, de la lenga que foguèt sieuna, qu’es totjorn sieuna. Mas que sabèm de l’istòria vertadièra de la lenga d’òc, de sas originas, de son espandiment, dels combats qu’engimbrèt? Los Archius departementals d’Aude, amb lo concors de l’Institut d’Estudis Occitans-Aude, convidan a trapar de responsas a aquestas questions en vistalhant la mòstra consagrada a la lenga occitana, a sos usatges e als movements que n’assegurèron la defensa, dempuèi l’Edat Mejana (primièras aparicions dins las cartas de tèrmes occitans als sègles X-XI1) fins als ans 1970-75 (movements occitanistas), sens doblidar lo Felibritge. Documents originals, objèctes, afichas, papierons, fotografias e òbras d’art son estats recampats per vosautres per vos faire tornar viure un passat recent o vièlh.
D’un panèl a l’autre, la mòstra balha d’entresenhas sus: lo nom de la lenga; l’unitat de la lenga; l’aparicion de l’occitan; la lenga dins la vida vidanta de l’Edat Mejana; los trobadors; lenga e religion; la trilogia latin, francés e occitan; las restriccions dels usatges de l’occitan (sègles XVIII e XIX); lo Reviscòl; lo Felibritge; los felibres audencs; las fèstas felibrencas; l’occitan a l’escòla: los tempses de reconquista; l’òbra de Renat Nèlli; federalisme e regionalisme; l’occitanisme politic; lo territòri occitan.
Un catalòg en francés e una brocadura acompanhan la mòstra. Los tèxtes dels panèls son represes per l’IEO-Aude dins de cronicas radiofonicas que se poiràn escotar sus Ràdio-Lenga d’Òc-Narbona e RCF-Pays d’Aude.
Los rescontres, recitals e conferéncias
Una tièra de rescontres completa la presentacion de la mòstra:
  — dimars 28/02, a 20h30: projeccion del filme de Yannick Séguier, Le Midi viticole 2. Des lendemains de la Première Guerre mondiale à la reconstruction du vignoble (Ostal del Departament)
— dimars 14/03, a 20h30: recital de Claudi Martí (AD: Archius Departamentals)
— dimars 21/03, a 20h30: "La Santa Estela de 1893 a Carcassona", conferéncia de Felip Martèl) (AD)
— dimars 28/03, a 20h30: recital de la corala Canti Canta (AD)
— dimars 9/05, a 20h30: "Desrabar, colleccionar, descriure? L’occitan fàcia a las enquistas suls pateses (fin del sègle XVIII-debuta del sègle XX)" , conferéncia de Domenge Baudreu (AD)
— dimars 23/05, a 20h30: "L’occitan dins l’escòla francesa", conferéncia de Yann Lespoux (AD)
— dimars 30/05, a 20h30: "Escriure en òc" (del sègle XIX a uèi e deman), conferéncia-lectura d’Alan Roch (AD)
— dimècres 7/06, a 20h30: recital de la corala Le Chiffon rouge (Narbona) (AD)  
Alan Roch


[Poblejat dins www.jornalet.com]




Nenhum comentário:

Postar um comentário