An condemnat a 3 ans e 6 meses de preson un cantador d’hip-hop per una cançon sul rei Joan Carles Ir

La justícia espanhòla lo farà encarcerar per enaurament del terrorisme, injúrias a la corona e menaças. La senténcia es de tres meses superiora a çò que demandava lo ministèri public

La justícia espanhòla a condemnat a tres ans e mièg de preson un cantador hip-hop de Malhòrca per las paraulas d’una cançon contra lo rei emerit, Joan Carles Ir. 

Lo musician, Josep Miquel Arenas, de nom d’artista Valtònyc, es estat condemnat per enaurament del terrorisme, injúrias a la corona e menaças, a causa de las paraulas d’una cançon, que podètz escotar dins lo vidèo çai jos. L’a jutjat e condemnat l’Audiéncia Nacionala espahòla, qu’es un tribunal d’excepcion que jutja los delictes de terrorisme.

La senténcia se prononcièt dimècres passat e es de tres meses superiora a la que demandava lo ministèri public.

Durant lo jutjament, Valtònyc reconeguèt qu’aviá compausat aquela cançon a la demanda de Pablo Iglesias, lo numèro un del partit politic Podèm, per son emission de television La Tuerka.

En seguida, podètz veire e escotar la cançon en question. Las paraulas son en catalan, e i a de sostítols en espanhòl.

[Poblejat dins www.jornalet.com]