La region nomenada Provença-Alps-Còsta d’Azur (PACA), a decidit de sosténer las associacions que trabalhan per l’antioccitanisme e lo secessionisme lingüistic e la fragmentacion de la lenga occitana, e punir los collectius que trabalhan per la lenga d’òc, en particular Calandreta. Dins aquel sens, lo Conselh Regional finançarà amb mièg milion d’èuros lo nomenat “Observatòri de la lenga provençala”, un projècte bailejat unicament pel Collectiu Provença del temps que las escòlas immersivas de Provença perdràn 35 000 èuros de la subvencion regionala. O raportèt Aquò d’Aquí, ne faguèt resson La Setmana, e o ne parlèrem sus Jornalet dimècres passat.
Lo president regional, Christian Estrosi, justifiquèt sa causida en insinuant que Calandreta ensenha pas la lenga que cal e que s’inscriu pas dins sa “politica de defensa de l’identitat e dei tradicions de la cultura”. Es evident qu’Estrosi preferís la folclorizacion e la museïficacion de la lenga e non pas sa transmission. E se cal contravenir a la sciéncia en parlant de lengas d’òc al plural, impòrta pas gaire, car a la fin, per el, s’agís totjorn de patés.
Per la còla de Jornalet, la decision d’Estrosi nos mena a una situacion d’urgéncia nacionala. Volèm pas demorar embarrats dins de tradicions del sègle XIX. Volèm simplament viure e decidir al país, e o volèm far dins una lenga digna e viva e en armonia amb totes las personas qu’abitan lo país, d’ont que vengan.
Per tant, la còla de Jornalet fa una crida desesperada als scientifics, als artistas, als elegits e a totas las personalitats del país, que sián de Provença o d’endacòm mai, a reagir publicament e a far tot lo rambalh que cal per reversar aquela situacion. Dins aquel sens cridam:
— los scientifics, especialament los lingüistas especializats en occitan o lengas romanicas, per fin que convengan d’un manifèst public en favor de l’unitat de la lenga occitana,
— los observatòris internacionals dels dreches umans e dels dreches lingüistics, per fin que conescan la situacion e reagiscan,
—tot l’occitanisme, per fin que daisse sas diferéncias de costat e s’unisca per una accion massissa per la lenga en Provença,
—l’Ofici Public de la Lenga Occitana, per fin que manifèste a Estrosi son malèsser e torne convidar a jónher l’ofici las regions nomenadas Provença-Alps-Còsta d’Azur e Auvèrnhe-Ròse-Alps,
— Carole Delga, presidenta de la region qu’a pres lo nom d’Occitània; Alain Rousset, president de la region que s’apèla Nòva Aquitània e que s’es declarat publicament occitan, e Laurent Wauquiez, president d’Auvèrnhe-Ròse-Alps, per fin que rescontren lo president Estrosi e que bastiscan de politicas lingüisticas seriosas e justas.
Ah! se me sabien entèndre!
Ah! se me voulien segui!
[Editorial poblejat dins www.jornalet.com]
Sem comentários:
Enviar um comentário