Barcelona: l’istòria d’Occitània en debat dins l’encastre de la Mòstra de Cinèma Occitan

L’Universitat de Barcelona aculhís un collòqui sus la repression del catarisme après la projeccion del filme Cathare de Michel Gayraud

Cathare

Dins l’encastre de la IXa edicion de la Mòstra de Cinèma Occitan, l’Universitat de Barcelona presenta aquesta dijòus 17 de novembre la projeccion del filme Cathare de Michel Gayraud (1999), seguida d’un collòqui sus l’istòria d’Occitània e son influéncia en Catalonha.

 

La projeccion serà precedida per una presentacion de l’òbra del realizaire Michel Gayraud, e serà seguida per un collòqui sul catarisme e lo biais que foguèt reprimit e anientat.

 

L’acte serà conduch per José Enrique Gargallo, professor de lingüistica romanica de l’Universitat de Barcelona e comptarà amb la participacion de Xavier Moral, responsable de la promocion de l’occitan a la Generalitat de Catalonha, e intervendràn los professors Sergi Grau e Meritxell Simó.

 

 

Un filme sus la fin de Guilhèm Belibasta

 

Cathare es un filme de Michel Gayraud, de 1999. Explica la fin de Guilhèm Belibasta, lo darrièr perfièch catar, En 1320, Belibasta quitèt lo País Valencian, ont èra refugiat amb Arnau Sicre, que lo traïguèt. S’agís d’un filme en occitan seleccionat dins lo festenal Résistance.

 

[Poblejat dins www.jornalet.com]