Pau: se tendrà dissabte una jornada de sosten als sens-papièrs amb lo filme Shens Papèrs

Puèi se realizarà una discussion-debat amb los realizaires del cort metratge musical en occitan e cabil

Se tendrà dissabte que ven a Pau (Bearn) una serada de sosten als sens-papièrs de l’estat francés amb la projeccion de Shens Papèrs, un cort metratge musical de granda qualitat ont se mescla la vida vidanta d’una familha sens papièrs, lo cant e la dança. Puèi se realizarà una discussion-debat amb los realizaires del filme. En mai d’aquò, se projectarà lo filme Aïssa per clavar la jornada.

 

L’eveniment aurà luòc a La Tor deu Borrèu, al numèro 2 de la còsta de la Hont de Pau, dins lo central quartièr del Hedars, segon lo programa seguent:

 

19h00 Acuèlh

19h30 Projeccion de Shens Papèrs

20h00 Discussion amb los realizaires de Shens Papèrs

20h30 Projeccion d’Aïssa

 

Shens Papèrs es un filme rodat a Aush, escrich e realizat per Philippe Espinasse, corealizat per Eva Cassagnet e filmat per Amic Bedel. Compta amb l’ajuda preciosa del CAMOM per l’enregistrament de la cançon. Lo filme es fach gràcias a la còla d’Art’Òc, que definís lo filme coma “tolerància, dobertura a l’autre jos las paraulas justas en occitan e en cabil”, amb lo fons de la musica entestanta e lo pas dels dançaires del rondèl. Un trentenat de dançaires participèron al rodatge del 8 de març passat a Samatan (Savés) per donar vida a un rondèl.

 

Aïssa es un cort metratge del parisenc Clément Tréhin-Lalanne sus l’istòria d’una filha congolesa de 17 ans, que las autoritats creson majora e que l’examina un mètge per que las autoritats determinen s’es expulsabla.

[Poblejat dins www.jornalet.com]