domingo, 9 de outubro de 2016

Los dètz ans de l’assassinat d’Anna Politkovskaia

La cronicaira pus critica amb lo govèrn de Putin d’alavetz foguèt fusilhada dins son ostal lo 7 d’octòbre de 2006

Divendres passat, se complissiá los dètz ans de l’assassinat de la jornalista russa Anna Politkovskaia. La cronicaira pus critica amb lo govèrn de Putin d’alavetz foguèt fusilhada dins son ostal lo 7 d’octòbre de 2006.
 
Quand foguèt assassinada, la jornalista èra a mand d’alestir un article entitolat “Te designam terrorista”, que deviá èsser publicat dins Novaia Gazeta. Dins aquel article, Politkovskaia met en evidéncia los metòdes policièrs dins la lucha contra lo terrorisme en Chechenia. Segon la jornalista, las acusacions se fan sens rigor e ela ne presenta de testimònis de primièra man espantoses. Lo jornal Vilaweb prepausa una traduccion d’aquel article en catalan, facha per Marta Ter, de la Liga dels Dreches dels Pòbles.
 
En mai d’aquò, Vilaweb prepausa tanben una transcripcion traducha en catalan de la darrièra intervencion de Politkovskaia a Ràdio Svoboda, dos jorns abans son assassinat. La jornalista parlèt d’un article de Iulia Latynina sus Ramzan Kadyrov, l’òme de Putin en Chechenia. Dins son intervencion, Politkovskaia acusèt Kadyrov de practicar una politica sistematica de tortura. D’aquela entrevista Vilaweb ne prepausa una transcripcion traducha en catalan.


[Poblejat dins www.jornalet.com]

Sem comentários:

Enviar um comentário