La Cort Criminala Internacionala condemna la destruccion de l’art

Al Mahdi diguèt qu’ara aviá vergonha de çò qu’aviá fach 

Aquesta setmana, la Cort Criminala Internacionala, a París, a decidit de declarar colpable un activista radical per sa destruccion d’autars e d’autres luòcs artistics d’una mosqueta dins la vila anciana de Tomboctó, en Mali. Seriá lo primièr còp qu’aquesta cort decidís de perseguir judiciàriament la destruccion del passat cultural d’una nacion coma un crime de guèrra. 

Aital, dins lo jutjament, se poguèt ausir qu’Ahmad Al Faqi Al Mahdi, membre d’un grop jihadista restacat a Al Qaida, auriá fach d’atacas contra un mur de fanga qu’aviá de centenats d’annadas e tanben contra plusors bastiments religioses islamics aital coma de tombèls d’òmes sants de la vila maliana de Tomboctó.

Al Mahdi, qu’es un professor qu’estudièt las leis islamicas en Arabia Saudita per mejan d’argent libian, tanben es estat acusat de menar una brigada de la moralitat en aquesta vila que punissiá publicament las gents per d’accions menoras. Mas Al Mahdi diguèt qu’ara aviá vergonha d’aquò qu’aviá fach.

“Senti fòrça vergonha de çò qu’ai fach” çò diguèt abans de demandar perdon a la cort que rend aqueste jutjament. De mai, tanben demandèt perdon a las gents de Tomboctó en tot dire: “Soi un filh de la vila qu’a perdut sa dralha e ara voldriái èsser perdonat”.

Pr’aquò Al Mahdi confirmèt qu’èra estat influenciat per “un grop de gents que cresián pas vertadièrament a l’islam e qu’èran d’Al Qaida e d’Ansar, una branca de la primièra en Mali”.  Tanben diguèt qu’esperava que son puniment “foguèsse un bon exemple pels marrits esperits amb qui aviá trabalhat fins a fa gaire”.

Al Mahdi poiriá recebre una pena de fins a 30 ans de preson per aquestes actes mas los procuraires aurián demandat solament una senténcia de fins a 11 ans pr’amor qu’Al Mahdi auriá confessat que desenant o tornariá pas jamai far un autre còp.

Un dels procuraires d’aqueste procès, Fatou Bensouda, diguèt qu’èra estat lo meteis Al Mahdi qu’aviá identificat los luòcs destruches e tanben qu’èra estat el meteis qu’aviá ordenat de los destruire.

Encara qu’Al Mahdi tanben poiriá èsser acusat d’autres crimes, aqueste jutjament de la Cort Criminala Internacionala voldriá centrar lo debat d’aqueste procès sus la destruccion de l’art e de bastiments istorics e culturals ancians a causa de l’intencion d’una persona o d’un grop de personas de voler far oblidar l’istòria e l’identitat de l’enemic.

 “La Cort Criminala Internacionala a longtemps esperat per reconéisser aqueste tipe de malafachas, çò diguèt Andras Riedlmayerm, un estudiant d’Art Islamic e Arquitectura a l’Universitat estatsunidenca d’Harvard, mas ara ja s’es pogut veire que i una relacion entre las atacas contra la populacion e las atacas contra son eiretatge cultural”.




Christian Andreu

[Poblejat dins www.jornalet.com]