Evo Morales denóncia una “conspiracion politica” per privatizar las ressorsas naturalas de Bolívia

Lo president condemna l’assassinat del viceministre de l’Interior dins l’encastre de las protèstas dels cooperativistas minièrs

Lo president de Bolívia, Evo Morales, a condemnat l’assassinat del viceministre de l’Interior, Rodolfo Illanes, victima de las protèstas dels cooperativistas minièrs. Segon Morales, aquelas mobilizacions son pas qu’“una conspiracion politica”, e precisa que seguisson pas vertadièrament una revendicacion sociala, segon çò que rapòrta Europa Press.
 
Dins una conferéncia de premsa, en seguida d’una reünion amb sos ministres, Morales a explicat que “lo dialòg èra totjorn present a cada moment”, mas que los cooperativistas minièrs volián pas dialogar. Dins aquel sens Morales precisèt que los protestataris demandan de poder signar de contractes amb d’entrepresas privadas e planhèt que i aguèsse mai de dirigents de l'oposicion a protestar que de cooperativistas, que “son estats enganats”.
 
Morales qualifiquèt l’assassinat d’Illanes de “coard” e defendèt que “las ressorsas naturalas son del pòble bolivian, e per tant lo declari eròi de las ressorsas naturalas”. Lo president declarèt tanben tres jorns de dòl oficials, mas sens suspension de las activitats, e afirmèt, net e clar, que “lo pòble bolivian cedirà pas sas ressorsas a d'interèsses privats nacionals e encara mens a d'estrangièrs”.

[Poblejat dins www.jornalet.com]