Nom de la region centrala: “Occitanie” a ganhat amb un 45% dels vòtes

An votat 203 993 personas. La region a sortit de son mutisme après de nombrosas protèstas

La presidenta de la region Carole Delga
ven d'anonciar lo resultat del vòte

“Occitanie”(Occitània) a ganhat, de longa tòca, lo procès participatiu per causir un nom per la region centrala de nòstre país, fruch de la fusion de Lengadòc-Rosselhon amb Miègjorn-Pirenèus. Lo 45% de las 203 993 personas qu’an votat, an causit aquel nom.

Los autres tres noms que se podián causir, “Languedoc” (Lengadòc), “Occitanie-Pays Catalan” (Occitània-País Catalan), “Pyrénées-Méditérranée” (Pirenèus-Mediterranèa), se situan entre lo 10 e lo 12%.

Los vòtes se son comptabilizats amb lo metòde de Condorcet.

La region voliá pas publicar los resultats fins al 24 de junh, après l’assemblada plenièra de la region qu’avisarà lo govèrn francés del nom qu’aurà causit. Que serà pas forçadament lo qu’an votat lo mond. Mas fin finala, a causa de las protèstas del Partit Occitan, País Nòstre, EELV e d’autres collectius, e gràcias a l’intervencion del membre del Comitat del Nom, Joan-Francés Laffont, la region a sortit de son mutisme.

Se tendrà en compte lo resultat?

Lo nom de la region serà votat pels elegits regionals lo 24 de junh que ven, e es possible que se tenga pas en compte lo resultat de la consultacion.

Segon qualques mèdias, circula la rumor que lo nom preferit pels politicians es Lengadòc-Pirenèus, çò qu’a mobilizat l’occitanisme. Lo Partit Occitan exigís de “democracia” e que lo resultat del vòte se faga public, EELV denóncia un blocatge dels resultats e País Nòstre crida a manifestar lo 24 de junh a Montpelhièr per que se respècte lo resultat del vòte.

La presidenta del Conselh Regional, Carole Delga, a dich, après anonciar los resultats, que caliá trobar una solucion per que los catalans se sentiguèsson pas discriminats dins la region.

Malèsser en Catalonha

De totas las opcions, la sola qu’inclusiá una referéncia a Catalonha èra “Occitanie-Pays Catalan”, mas lo bas pes demografic del territòri catalan dins la region a fach impossible qu’aquela opcion s’impause. “Es una denegacion totala de l’identitat catalana”, çò declarèt l’adjoncha al cònsol de Perpinhan Anabelle Brunet.

Tweets sobre #lenomdemaregion

[Poblejat dins www.jornalet.com]