L’ÒNU sollicita lo govèrn argentin per prene de mesuras e per melhorar la situacion dels indigènas

D’indigènas mapuches participan a
una manifestacion contra las
activitats de las entrepresas
petrolièras dins lors tèrras

Lo raportaire especial de l’ÒNU sul racisme sollicitèt dimars passat lo govèrn d’Argentina per que prenguèsse de mesuras urgentas, per fin d’afrontar la marginalizacion e l’exclusion sistematica dels pòbles indigènas, que son un dels grops mai vulnerables dins lo país.

Mutuma Ruteere vesitèt Argentina del 16 al 23 de mai per avalorar la situacion d’aqueles pòbles, e tanben la dels afrodescendents e dels emigrants.

Ruteere indiquèt que, coma en d’autras partidas del Mond, las practicas discriminatòrias dins lo país afèctan frequentament los paures e en particular los que, en mai d’aquò, fan partida de grops minoritaris.

L’expèrt reconeguèt qu’Argentina compta amb un encastre juridic larg per l’eliminacion de la discriminacion raciala e per l’egalitat dels dreches per totes sos abitants, que sián d’argentins o d’estrangièrs. Ça que la, diguèt que l’aplicacion de las leis es deficienta e que de problèmas importants persistisson.

“La situacion dels pòbles indigènas dins cèrts airals del país es terribla, perque vivon dins l’extrèma pauretat, dins un isolament sòciocultural e sens accès als servicis basics coma la santat, un abitatge decent, e quitament l’aiga potabla”, çò avertiguèt Ruteere.

A l’encòp, volguèt soslinhar lo fach qu’es alarmanta la repression que patisson dins diferentas partidas del país las mobilizacions dels grops indigènas que revendican lors dreches.

Soslinhèt tanben l’impunitat que ne gaudisson las fòrças de seguretat publicas dins los cases de discriminacion per perfil racial e diguèt que l’abséncia d’una politica eficaça d’integracion dels migrants contribuís encara mai a la marginalizacion e l’estigmatizacion d’aquel grop.

Lo raportaire especial presentarà en junh que ven un rapòrt amb sas observacions sus Argentina al Conselh dels Dreches Umans.