La pollucion de l’èr tua en França tant coma l’alcòl

L’Agéncia Santat Publica França ven de publiar un estudi que mòstra que la pollucion de l’èr tua 48 000 personas per an, tant coma l’alcòl, contra 80 000 per lo tabat.

L’estudi menat per Santat Publica França actualiza las chifras europèas de l’an 2000. Son 48 000 las personas que mueren chada annada a causa de las particulas finas liadas a l’activitat umana. Èran 40 000 fai setze ans. Quela polluccion tòca pas solament las vilas grandas mas las petitas e mejanas tanben, tant coma las zònas ruralas. Una autra consequéncia es la pèrda d’esperança de vita que vai de 9 a 15 mes, segon l’endrech ont demoravatz.

L’estudi mòstra que quò es l’exposicion quotidiana la mai dangierosa e que l’efiech daus famós pics de pollucion es marginau. Mòstra tanben que de las solucions son possiblas. Si los nivèus de particulas finas èran redusits a çò que son dins las comunas mens polluidas, evitariam 34 000 decès per an. Santat Publica França soslinha la nessecitat de politicas d’intervencions per melhorar la situacion: modificacion de la composicion daus carburants, mesa en plaça de peatges urbans, practica de la bicicleta, reduccion de las emissions industrialas… Aura quò ven aus poders publics de prene la mesura dau tresesme risc sanitari en França.

 
 
 
Maime Caillon

[Poblejat dins www.jornalet.com]