Es ke mutchos ijos de famiyas sefaradis tienen un sentimiento de urjensia ke les aze manear i tomar en mano todos los pedasos de este kodja « puzzle » : la lingua, el gizado, el kanto, la literatura i sovre todo la manera de ser de estar i de ver el mundo, un arte de bivir endjuntos.
La Universita de enverano djudeo-espanyola en Paris, kon su programa ainda mas intenso i internasional, es la okazion de deskuvrir lo mijor ke ay en el mundo djudeo-espanyol i todas sus ramas.
Para esta tresera edision de la Universita mitimos el aksento sovre la pedagojia en organizando mas atelyes, para todos los niveles i para todos los publikos: lingua, kanto, kultura, kuzina i para los mas tchikos un atelye de ilustrasion de konsejas.
Ande los Djudeo-espanyoles, gozar el estudio va siempre endjunto kon el plazer de la persona. Muestra kuzina sera avierta kada dia i vamos a resivir artistas de Israel, de Nueva York, de Berlin i de Londra para sinko kontchertos eksepsionales.
La Universita djudeo-espanyola es avierta para todos. Es el mijor lugar para enkontrarsen i empesar muevos prodjektos. Una ves mas, este anyo perkurimos mantener presios muy atraktivos para pueder resivirvos ainda mas mutchos i permetervos de tener parte en esta grande aventura : ke esta kultura de dos mil anyos briye de mil luzes, de la manera la mas aktual i fiestoza.
[Source : www.ueje.org]
Sem comentários:
Enviar um comentário