Internacionalizar los atacs contra l’occitan

Accion per revendicar lo mantenement 

dels corses d’occitan. 

Manòsca 31 de mai de 2016

Se debanèt dimècres passat un seminari al Parlament Europèu sus las discriminacions lingüisticas. A aquela jornada organizada per l’elegida del Sinn Feinn Liadh Ní Riada, i participèron lo Ret Europèu per l’Egalitat Lingüistica (ELEN) e d’eurodeputats e de representants de la societat civila dels Païses Catalans, de Bascoat, del País de Galas, d’Irlanda e de las minoritats ongresas d’Eslovaquia e de Romania. La tòca de l’eveniment èra de compilar las discriminacions lingüisticas qu’existisson en Euròpa e de las denonciar a las institucions de l’Union Europèa. La conclusion foguèt neta e clara: “la discriminacion lingüistica es una forma de racisme” e per aquela rason s’exigís a l’Union Europèa de mesuras urgentas.

 

Lo protagonista de la jornada foguèt lo rapòrt fach per Plataforma per la Llengua, una organizacion catalana que sa tòca es de promòure e de defendre lo catalan. Aquel rapòrt presenta trenta sèt cases de discriminacions lingüisticas que se son produchas dins un periòde de 18 meses. Una situacion que l’eurodeputada irlandesa considerèt “absoludament inacceptabla”. Imaginatz çò que diriá se vesiá la situacion de l’occitan!

 

Cada jorn es mai evident que França es pas res mai qu’una immensa preson de pòbles e de nacions, qu’impausa sos decrets a còps de 49.3 e qu’inventa de reformas escolaras per tuar definitivament sa diversitat lingüistica e culturala. Contra aquel ancian regim uniformizaire qu’es vengut l’excepcion mondiala, la sola solucion qu’avèm es la solidaritat internacionala. L’internacionalizacion del conflicte de Sivens foguèt providenciala per ganhar un combat per l’environament que costèt quitament la vida d’un jove occitan. Cal que denonciem internacionalament las agressions contra los dreches umans dels occitans, los lingüistics tanben.

 

Avèm besonh d’un observatòri de l’occitanofobia que denóncie internacionalament las mancas dels dreches lingüistics. A l’ora d’ara avèm un fum de causas per denonciar a l’Union Europèa e als tribunals internacionals dels dreches umans: la reforma del collègi prevei de marginalizar mai encara l’ensenhament de l’occitan, se redutz las subvencions e las politicas lingüisticas per l’occitan en tot relegar la lenga al folclorisme, podèm pas occitanizar los prenoms escriches en francés sus la carta d’identitat e los autres documents oficials, avèm pas drech d’èsser jutjats en occitan, l’administracion publica nos compren pas dins la nòstra lenga, nos fan pagar la “redevença” pels mèdias en francés del temps que nos cal far de dons als mèdias en occitan per que subreviscan… Se fasiam una lista completa, poiriam far un rapòrt milanta còps mai grand que lo de Plataforma per la Llengua. Ven a nosautres de denonciar e d’internacionalizar totes aqueles cases d’occitanofobia. Nos metèm al trabalh?

[Poblejat dins www.jornalet.com]