Brussèlas e Genèva examinan la discriminacion lingüistica de l’estat francés

Los expèrts de l’ÒNU s’estonan de la posicion francesa a prepaus de la manca de dreches lingüistics

European Language Equality Network

L’occitan Alexis Quentin e lo breton Tangi Louarn, representants del Ret Europèu per l’Egalitat Lingüistica (ELÈN segon sa sigla en anglés), intervenguèron diluns passat al Conselh Economic, Social e Cultural de l’ÒNU a Genèva. I presentèron las discriminacions contra los locutors de las lengas autoctònas de l’estat francés dins l’encastre de l’educacion, los mèdias e la vida publica. “Avèm remembrat que segon la Comission Europèa contra lo Racisme e l’Intolerància (ÈCRI), França a una granda mancança tocant la discriminacion lingüistica”, çò expliquèt Louarn a Le Telegramme.

 

Al cors d’aquela session, dos expèrts independents del comitat, un espanhòl e un colombian, interpelèron la delegacion francesa. “L’expèrt espanhòl s’es estonat de la posicion francesa que la modificacion constitucionala que fa de las lengas regionalas un patrimòni de França crèe pas cap de drech ni cap de libertat que la Constitucion garentisca”, çò afirmava lo representant breton a Ouest France. De fach, aquel expèrt “s’interroguèt tanben sus la lectura restrictiva dels dreches que fa França de la Carta Europèa de las lengas Regionalas o Minoritàrias”.

 

De fach, el soslinhèt que lo rapòrt de l’ÈCRI constata la caréncia de l’estat francés tocant la discriminacion lingüistica e demandèt a la delegacion francesa de “comolar aquela mancança”.

 

Alexis Quentin e lo breton Tangi Louarn avián ja presentat la situacion de las lengas de l’estat francés lo 1r de junh al Parlament Europèu dins l’encastre del seminari sus las discriminacions lingüisticas, organizat per l’elegida del Sinn Feinn, Liadh Ní Riada, e per lo Ret Europèu per l’Egalitat Lingüistica (ELÈN).

 

 

L’ELÈN

 

Lo Ret Europèu per l’Egalitat Lingüistica (ELÈN) se constituiguèt en 2011 per trabalhar sus la proteccion e promocion de las minoritats regionalas d’Euròpa e de las lengas en situacion de minorizacion. Fins ara, representa 44 lengas dels 21 estats europèus.

 

A tanben una seccion dins l’Estat francés que trabalha per denonciar las discriminacions contra la nòstra lenga entretant.

 

 

[Poblejat dins www.jornalet.com]