Eth Partit deth Movement Democratic de Brasil (PMDB), qu’enquia ara ère en coalicion damb era presidenta deth país, Dilma Rousseff, a deishat eth govèrn e menace ara presidenta damb un jutjament que poderie arturar politicaments eth país mès gran dera America deth Sud.
Atau, eth PMDB, damb 68 membres ena Cramba Baisha deth congrès brasilian, dèishe eth govèrn e taben era pòrta dubèrta a un possible jutjament dera actuau presidenta de Brasil dempús d’auer nomentat a Lula de Silva recentaments coma ministre sens pòrta-huelha.
Demiei es ministres deth govèrn deth PMDB qu’an quitat eth govèrn i a eth ministre dera santat e eth ministre dera Aviacion Civila, ministeris fòrça importants en Brasil, qu’aurien metut as auti membres deth govèrn en ua situacion de paralisi politica totau. Es analistes diden qu’aguesta serà plan mès grana.
Suposada corrupcion en Petrobras
Tot aquerò començèc hè 2 ans quan era opinion publica brasiliana coneishec diuèrsi ahèrs de corrupcion ena companhia de petròli estatau Petrobras. Er ahèr toquèc ar anterior president de Brasil, Ignácio Lula da Silva, e ara met en perilh politic ara presidenta actuau, Dilma Rousseff.
Tot aquerò a pr’amor que que Rousseff poderie èster jutjada per ua comission politica brasiliana qu’aurie de decidir se Rousseff pòt contunhar d’èster era presidenta de Brasil o non. En tot començar eth jutjament, aquera madeisha cramba poderie suspéner a Rousseff coma presidenta pendent mès de 180 dies. E aquerò vò díder paralisi política.
Mès Dilma Rousseff, segons diuèrsi analistes internacionaus, encara pòt hèr a retrocedir eth jutjament en tot trobar quaque hèt illegal en procès e atau encara guanharie temps entà quauqui mesi. “Que pòt encara trapar quauque hèt legau qüestionable”, çò diguec Brasilio Sellum, professor de sociologia ena Universitat de São Paulo.
Ath delà d’aquerò, diuèrses votzes ja an alertat qu’un cambiament de president non ei era solucion, se Rousseff quitèsse eth president sèrie temporauments Michel Temer, cap deth PMDB. “Un jutjament non ei cap era solucion ara crisi politica que patís Brasil”, çò confirmèc João Augusto de Castro Neves, director d’Eurasia Group ena region, “pr’amor qu’eth PMDB tanben a auut ahèrs de corrupcion per investigacions de Petrobras. Se i auesse eleccions non podem saber que se passarie”, çò higec.
Per tot aquerò, es analistes ja parlen d’ua crisi en toti es nivèus, politic, economic e sociau, en Brasil, pendent es dus ans que vien. E tot aquerò sens auer a Rousseff, a Termer o encara a un auta persona coma president deth país latinoamerican mès gran.
Christian Andreu
[Sorsa : www.aranes.org]
Sem comentários:
Enviar um comentário