Lo Parlament de Brasil a votat la destitucion de Dilma Rousseff

La cambra bassa del Parlament de Brasil acceptèt dins la nuèch de dimenge la mocion de censura de la presidenta Dilma Rousseff. Aquel vòte marquèt lo començament del procès de destitucion de la maximala autoritat del país. Mentretant, per carrièras, dins las vilas del país se seguissiá l’eveniment amb d’ecrans gigants, e los detractors de Rousseff festegèron la decision parlamentària.   Ara lo Senat deu decidir se lança lo jutjament contra la presidenta. Una majoritat de senators an ja anonciat que votaràn per que la presidenta siá jutjada. S’es lo cas, serà lo quite Senat que jutjarà la Roussef, e pendent los 180 jorns que durarà lo jutjament, aquesta serà escartada del poder. En cas que siá considerada coma colpabla, perdrà automaticament la carga.   Segon l’article 85 de la Constitucion brasiliana, la cambra pòt menar a bon tèrme un jutjament politic contra la presidéncia se considèra qu'a violat los principis o las obligacions de la siá carga. Dins aquel cas, Rousseff es acusada d’aver contornejat los comptes per amagar lo deficit dins lo budget. Roussef a afirmat, per sa defensa, qu’aquela practica es abituala dins totes los govèrns brasilians dempuèi la restauracion de la democracia.   Encara que lo jutjament politic (“impeachment”) se basa formalament sus aquel contornejament dels comptes, son las acusacions de corrupcion contra Rousseff e son partit qu’an favorit l’ambient qu’a portat lo vòte istoric de dimenge.   Lo procès contra la presidenta es estat impulsat sustot pel president del Parlament, Eduardo Cunha, del Partit del Movement Democratic Brasilian, qu’èra, fins a fa gaire, aliat del Partit dels Trabalhadors de Dilma Rousseff. Cunha es en cors de jutjament e es un dels politicians citats dins las  denonciacions per l’escàndol de Petrobras.   Qualques autres aliats istorics del Partit de la Trabalhadora se son associats al jutjament contra Rousseff, coma es lo cas dels socialdemocratas. I a agut quitament qualques deputats del PDT qu’an jongut la demanda de jutjament de la presidenta. Los ancians aliats del PT vòlon que lo vicepresident Michel Temer siá lo nòu president, e crear una coalicion que comprendriá de partits de la drecha.   Per ne saber mai, lo jornal catalan Vilaweb recomanda de legir lo blòg de Taíza Brito entitolat “L'estrangièra”. Lo podètz legir en catalan o ben traduch automaticament en occitan. [Poblejat dins www.aranes.org]