The New York Times publica d’imatges inedits de l’istòria afroamericana

Es aital que lo jornal a commemorat pendent tot febrièr lo mes de l’istòria dels negres

http://www.nytimes.com/interactive/projects/cp/national/
unpublished-black-history/looters-for-jobs-march-in-the-south-bronx-1977

En febrièr se commemòra en Estats Units e en Canadà lo nomenat Black History Month (Mois de l'Histoire des Noirs, en Quebèc), en remembre als eveniments e personatges màgers restacats a l’istòria de la diaspòra africana en America. Pendent tot aqueste mes se son debanadas de manifestacions e d’iniciativas, e ongan lo jornal The New York Times a participat de l’eveniment amb una inciativa de revendicacion e de critica intèrna a l’encòp.

Aquel jornal a recuperat, de sos enòrmes archius fotografics, fòrça imatges pròpris de luchas d’actors importants pels dreches dels afroamericans dins los Estats Units, que s’èran pas jamai publicats. Del 1r de febrièr fins a uèi, 29 de febrièr, lo jornal a publicat cada jorn un d’aqueles imatges.

Òm pòt veire d’imatges inedits de l’activista Rosa Parks, de la cantaira d’opèra Martina Arroyo, d’un grop de “cowboys” afroamericans a Nòva Jersey, de la reina del gospel Mahalia Jackson, de l’esportiu de tennis Arthur Ashe e quitament de Jesse L. Jackson en manifestant quand èra tot jove a Chicago en 1969.

[Poblejat dins www.jornalet.com]