Se lança una granda consulta sul futur nom de la region Lengadòc-Rosselhon e Miègjorn-Pirenèus
 |
Joan-Francés Laffont de
Convergéncia Occitana de Tolosa
diguèt qu’aquela consulta èra
l’ocasion de faire aparéisser lo mot
Occitània sus las mapas del Mond,
amb un sosten popular plan larg
|
La region administrativa nòva eissida de l’union de Lengadòc-Rosselhon e Miègjorn-Pirenèus lança una granda consulta sus son nom futur. Es Gérard Onesta, lo president del Burèu del conselh regional qu’es en carga de l’organizar.
La region nòva reculhís l’opinion dels actors institucionals per determinar una lista de noms possibles amb la sasina del Conselh Economic, Social e Environamental Regional (CESER) e la consulta dels elegits e organizacions representativas. La region creèt un “Comitat del Nom de la Region” compausat de 30 membres eissits de la societat civila e de totes los territòris per debatre del nom nòu e per seguir lo procès de consulta.
La consulta se fa en tres fasas:
1) La primièra fasa que s’acaba lo 15 d’abril permet a cadun de prepausar un nom per internet sul sit http://www.regionlrmp.fr/le-nom-de-ma-region.
2) La segonda fasa passa per l’adopcion, lo 15 d’abril de 2016, per la reünion plenièra del conselh regional d’una lista de noms eissida de la primièra fasa.
3) Una consulta ciutadana per causir un nom d’aquela lista se farà sus l’ensems dels abitants de la region fins al començament del mes de junh, segurament per via de premsa e Internet amb una verificacion d’identitat. En seguida, los elegits regionals adoptaràn lo 24 de junh de 2016 un avís que mandaràn al govèrn. Un decret en Conselh d’Estat deuriá validar aquel nom abans lo 1r d’octòbre de 2016.
En setembre de 2015, una primièra consulta informala mesa en plaça per la premsa regionala (veire Sondatge per lo nom de la region nòva d’Occitània centrala sus Jornalet) donèt Occitània coma primièra causida, amb 23% subre mai de 100 000 vòtes informatics sus internet.
Aqueste 20 de febrièr de 2016, una amassada occitana e catalana se faguèt a l’Ostal Occitan de Narbona amb una cinquantena de responsables de movements occitanistas a l’iniciativa de País Nòstre e del collectiu catalan Sem. Un consens se faguèt subre la la proposicion “Occitània-Catalunya”.
En seguida, lo Partit de la Nacion Occitana (PNO) faguèt un comunicat entitolat: “Lo PNO encara e sempre per la denominacion “Occitània Centrala”. Per lo Partit Occitan, Occitània non pòt se redusir a la futura Region Lengadòc-Rosselhon e Miègjorn-Pirenèus. I vòl juntar un acronim respectuós de las autras tèrras occitanas coma Occitània-Sud o Occitània-Centrala…
Aqueste 14 de març, lo CESER regional dirigit per Jean-Louis Chauzy prepausèt “Lengadòc-Pirenèus”, dins la dralha de las denominacions administrativas de l’estat francés. Lo president del CESER declarèt que “Lo tèrme Lengadòc correspond a una realitat istorica e lo de Pirenéus es emblematic de l’espaci regional”.
Aqueste 16 de març, dins una presa de paraula de commemoracion a Montsegur, Joan-Francés Laffont de Convergéncia Occitana de Tolosa diguèt qu’aquela consulta èra l’ocasion de faire aparéisser lo mot Occitània sol o compausat sus las mapas del Mond, amb un sosten popular plan mai larg que lo sol mitan occitanista.
Las seccions regionalas dels autres partits de França an pas encara pres de posicion sul sicut.
Jean-Charles Valadier
Sem comentários:
Enviar um comentário