Keridos amigos,
Este djueves ke va ser el 31 de desyembre, yo sere ke eskapare las emisyones de Radyo J de este anyo. La emisyon ke apareji es un poko una meskla, porke vo empesar por eskapar mi emisyon del djueves pasado sovre Erdogan i Israel, ande me kortaron la palavra antes ke pueda eskapar (syendo ke aviya empesado 4 minutos despues de mi tyempo normal de avla). Vos dire despues dos byervos sovre una deskuvyerta de astrofizika. Despues vos dire dos byervos sovre Salvador Dali, i despues avlare de un artikolo de la Revista Yessod sovre los amigos goyim de los djudyos i de Israel.
Este djueves ke va ser el 31 de desyembre, yo sere ke eskapare las emisyones de Radyo J de este anyo. La emisyon ke apareji es un poko una meskla, porke vo empesar por eskapar mi emisyon del djueves pasado sovre Erdogan i Israel, ande me kortaron la palavra antes ke pueda eskapar (syendo ke aviya empesado 4 minutos despues de mi tyempo normal de avla). Vos dire despues dos byervos sovre una deskuvyerta de astrofizika. Despues vos dire dos byervos sovre Salvador Dali, i despues avlare de un artikolo de la Revista Yessod sovre los amigos goyim de los djudyos i de Israel.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos,
Edmond Cohen
Paris - Fransya
LOS AMIGOS GOYIM DE ISRAEL
Saludes i anyada sivil buena para todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radio J, http://www.radioj.fr, ama, malorozamente, estos tyempos solo en direkto (el djueves a las 4 i sesh, kale klikar arriva a la derecha, sovre Ecoutez Radio J en direct)
De otra parte, vos akodro ke el proksimo atelye de konversasyon de Vidas Largas se va tener el martes ke vyene 5 de janvier 2016, de las dos a las kuatro, en el Centre Communautaire. Estos atelyes son avyertos a todos, venid munchos.
La semana pasada, syendo ke tuve la palavra solo a las kuatro i diez i no a las kuatro i sesh, no pude eskapar la emisyon ke aviya aparejado sovre Poutine i Erdogan. Sovre Poutine, ya pude dizir lo ke aviya aparejado, ama para Erdogan, no.
Kuando tuve de desharvos, vos estava dizyendo ke las relasyones entre la Turkiya i Israel eran bastante buenas, asta la operasyon dicha plomo fundido, de Israel kontra el Hamas en Gaza, ke sureo del 27 de desyembre 2008 astal 18 de janvier 2009.
Erdogan se mete en birra kontra Israel, i unos kuantos diyas despues, el 29 de janvier, en la Konferensya de Davos, delantre de todos los gazeteros, se arravya en publiko kontra Shimon Peres, prezidente del Estado, ke le responde, en buen djudyo, por una kuestyon: “kualo uvyera echo la Turkiya si kadal diya el Hamas le echava roketas sovre Estambol?” Erdogan se alevanta i se va sin responder.
Desde este diya las relasyones se embatakan mas i mas. En mayo 2010, organizasyones antisyonistas, turkas i otras, embiyan vapores para enforsar el blokus de Gaza. Israel se opone, i sovre el vapor Mavi Marmara, 10 turkos son matados por los askeres Israelyanos.
Esto va derrokar las relasyones entre los dos paizes. De toda manera, los zabites poderozos i laikos de la armada turka, ke fue durante anyos el haliz poder en Turkiya, an sido echados en prezo por Erdogan. Eyos eran ke entreteniyan la amistad kon la armada israelyana. Erdogan dize ke nada podra rekalentar las relasyones entre los dos paizes si Israel no prezenta ekskuzas. Israel kyere byen eksprimar regretos, ekskuzas no
Vyendo esto, Israel se aserka de la Gresya, por lo ke es de la kooperasyon militar.
Malgrado esto, en desyembre 2010, la Turkiya embiya dos avyones bombarderos de agua para luchar kontra el fuego del Monte Carmel.
Esto mos amostra ke afillu el konflikto entre los dos paizes sovre la Palestina, el komersyo i el ayudo no kedaron, afillu si, en septyembre 2011, Erdogan anunsya la suspensyon de sus relasyones kon Israel en el dominyo militar. Este mismo anyo 2011, Israel i la Turkiya aviyan tomado un akodro asigun el kual Israel va vender a la Turkiya armas de defensa elektronika por 25 milyones de dolares.
Ama Erdogan el mismo dize ke lo ke es sospendido son los akodros militares, no los akodros komersyales.
Las kozas no se pueden enderechar kon la operasyon Pilar de defensa en novyembre 2012 kontra el Hamas en Gaza.
I portanto, parese ke Israel tyene un grande menester de la amistad turka, porke en fevrero 2013 Israel embiya a la Turkiya las armas del akodro 2011, i el 22 de marso, Netanyau, komo se dize en fransez, kome su chapeo, i yama a Erdogan, para prezentarle ekskuzas por la muerte de los diez turkos, ama Erdogan kyere tambyen una indemnizasyon i de alevantar el blokus sovre Gaza.
Israel, syendo ke prezento ekskuzas, no es kontra una indemnizasyon, ama alevantar el blokus es otra koza. Sin blokus, los terroristos del Hamas van a resivir armas, i esto Israel no lo puede achetar.
En 2014, es la operasyon frontera de proteksyon en julyo, ama antes, en mayo, una corte kriminala de Estambol kondena in absentia a 4 zabites israelyanos i demanda a Interpol ke sean aferrados.
Malgrado esto todo, los dos paizes, Israel i Turkiya, tyenen menester el uno del otro. Israel, arrodeado de enemigos mortales, tyene menester de un alyado militar i ekonomiko. Por su parte, la Turkiya se metyo a mal la Rusia kon este avyon abatido por los turkos. I mos ambezimos ke el 16 de este mes de desyembre, akodros sözde sekretos, ama no tan sekretos syendo ke se topan en todas las gazetas, an sido tomados en Zurich en Suissa entre Israel i Turkiya. Asigun lo ke meldi, va aver de muevo embashador en kada pais, las segidas kontra los zabites israelyanos van a ser abandonadas, Israel va pagar 20 milyones de dolares a las famiyas de las viktimas del Mavi Marmara, Saleh al Aruri, el ke izo matar a tres mansevikos israelyanos en 2014, sera echado afuera de Turkiya. I los dos paizes van a kooperar por el gas. La Turkiya puedra merkar el gas israelyano, i un pipeleine pasara por la Turkiya verso los paizes de Evropa.
Aki tambyen, kualo va salir de esto todo, no se puede saver, i yo so kontente de no ser un responsavle politiko en Israel, porke dirijirse en un kamino tan entrafikado, no se komo aze un Netanyau para durmir…
Agora vengo solo de eskapar mi emisyon de la semana pasada i puedo empesar la de oy.
En vedra, antes de empesarla, vos kyero dar un haber ke por siguro no va trokar vuestras vidas, ama puede ser vos va interesar:
En la Universidad Hebraika de Yerushalayim (Institudo Racah de Fizika) ay un profesor de astrofizika de alto nivel ke se yama Yehuda Hoffman. Este profesor, kon un amerikano (Brent Tully, Universidad de Hawai) i dos fransezes (Helène Courtois, Universidad de Lyon-1, i Daniel Pomarède, Institudo de Bushkedad sovre las Leyes Fundamentales del Universo, en Saclay) eskrivyeron un artikolo puvlikado el 4 de septyembre 2014 en la famoza revista Nature, intitolado The Laniakea supercluster of galaxies (el supermonton de galaksiyas nombrado Laniakea).
Asigun este artikolo, el supermonton de galaksiyas yamado de la Virjen, ande se topa muestra galaksiya yamada Kamino Lechozo (Voie Lactée, en franses; Milky Way, en ingles) aze parte el mismo, kon otros supermontones komo el del Hydre-Centaure i el del Pavon Indyano, de un supersupermonton ke yamaron Laniakea, de dos byervos hawayanos ke kyeren dizir Syelo Enorme.
No es solo una manera jeografika de aunir estreyas, se fundan sovre la idea ke lo ke aune todas las galaksiyas de Laniakea es ke estas todas, ama solo estas todas, van en djuntas verso un sentro yamado el Grande Atraktador.
Aki me vo kedar sovre este haber ke es malorozamente demaziyado arriva de mis kapachedades syentifikas. Si yene vos avli de esto, es de una parte porke me paresyo interesante, i de otra parte para amostrarvos ke Israel tyene grandes syentifikos, ama esto ya lo saviyash de antes!
I agora es tyempo de venir a mi emisyon:
Estos diyas, topi el numero 3 de la revista Yessod (fundamyento, en lashon), editada por el Keren Hayessod de Fransya. Para los ke no lo savriyan, el Keren Hayessod es el organismo ke akoje paras en el mundo entero (salvo los Estados Unidos) para las grandes ovras de Israel.
Los ke son interesados por este numero 3 i ke entyenden el franses lo pueden topar entero indosen sovre internet en el sityo del Keren Hayesod de Fransya.
Para oy, vos kyero avlar de lo ke meldi en esta revista sovre “Estos amigos non-djudyos de Israel”, un tefter de munchos artikolos akojidos por Caroll Azoulay. I en mismo tyempo, arresivi de mi amigo José Molho un diapo sovre la amistad del pintor Salvador Dali verso Israel.
Es pekado ke a la radyo no vos pueda amostrar la ovra de este pintor en favor de Israel porke seriyash bastante enkantados de ver estas bandyeras de Israel, kon estos Magen David, pintados por un ombre konosido por aver tenido palavras en favor del fasismo. Meldi mismo ke uvyera dicho ke el programa de Hitler para arrevatar a los djudyos era la mijor solusyon a la kuestyon djudiya. Ama de esto no topi dinguna fuente. A la rovez, kuando meldo ke, entre 1950 i 1980, por amor por su mujer Gala, djudiya rusa (komo lo era tambyen Elsa Triolet) izo mas de 250 ovras artistikas de todo djiz sovre el djudezmo i el Estado de Israel, esta vez la preva la tengo delantre de mis ojos.
En 1968, izo una ekspozisyon intitolada “Aliyah, the rebirth of Israel” (Aliya, el renasimyento de Israel), kon ovras de pintura a la agua pintadas sovre todo en 1967. Se pueden ver deportados djudyos detras de los barbelados, ama tambyen askeres djudyos luchando por Yerushalayim, o Ben Gurion deklarando el Estado, o una mila, ets. I esto se puede ver sovre internet, bushkando Dali, Aliyah.
I agora avlaremos de lo ke meldi sovre la revista Yessod, i por empesar un artikolo sovre los kristyanos amigos de Israel, ke azen lo mas parte de los Evanjelikos, i ke son medyo milyarda de djente espartidos en el mundo entero.
Kada anyo unos 20.000 de entre eyos vyenen kon bandyeras a Yerushalayim para manifestar sus amor de Israel i del puevlo djudyo.
Kale yene saver ke si es vedra ke son muy amigos de los djudyos i de Israel, no kedan de ser kristyanos, i sus idea es ke un diya los djudyos se van a azer kristyanos eyos tambyen, i rekonoser el reyno del Kristo.
Un otro artikolo mos avla del muzeo dicho de los Amigos de Tsion, ke se avrio el 8 de septyembre de este anyo en Yerushalayim. Este muzeo tyene por eskopo de render un omenaje a los miles de goyim ke ayudaron al puevlo djudyo durante los ultimos generansyos, sea durante el Mandato Britaniko, sea durante la Shoah, sea durante los primeros diyas de la kreasyon del muevo Estado. Sinko tabakas, 600 metros kuadrados, para kontar la istorya de syenes de famiyas non djudiyas ke riskaron sus vidas para salvar i sostener el puevlo de Israel. Entre eyos, Harry Truman, Winston Churchill, Oskar Schindler, Raoul Wallenberg, o la famiya Ten Boom. Por dizirvos la vedra, yo nunka teniya oido sovre esta famiya Ten Boom. Me ambezi ke eskondyeron djudyos ande eyos, i denunsyados fueron enkarselados, sin ke la Gestapo reusha de topar los djudyos eskondidos ke pudyeron eskabuirse grasyas al ayudo de un pulis. Ama los Ten Boom kedaron enkarselados. Un mes despues el padre de 85 anyos se muryo en prezo. Las dos ijas fueron deportadas en Ravensbruck ande una se muryo. La otra, Corrie Ten Boom, sovrebivyo i eskrivyo su istorya en un livro intitolado Hiding place (el eskondijo).
Puede ser me vash a dizir : ke diferensya tyene este muzeo kon Yad Vashem? Asigun lo ke entendi, esta vez no son djudyos ama kristyanos ke estan detras de este muzeo, i mas presizamente el pastor baptisto Mike Evans, direktor del Instituto bibliko de Geneve, asigun el kual los djudyos ke vendran a vijitar este muzeo podran salir dizyendosen: “no somos solos”.
Otro chiko artikolo: 40 pastores iranyanos vinyeron a Yerushalayim para demandar pedron al puevlo djudyo, por el odyo kontra el del estado de Iran i de sus kapos relijyozos. Los kapos de la delegasyon, los pastores Thomas Campbell i Afshin Javid, izyeron un dono de 20.000 dolares al Estado de Israel a traves del Keren Hayessod.
Otro artikolo konsagrado a un sityo internet en franses ke tyene komo titolo: “Ces Goys qui défendent Israël - Le site des non-juifs qui soutiennent les juifs et Israël” (Estos Goyes ke defenden a Israël - El sityo de los non djudyos ke sostyenen los djudyos i Israel). A la orijen de este sityo, un mansevo protestanto: Thimothée Larribau. Su sityo tyene mas de 20.000 amadores i es mirado por 250.000 personas al mes (asigun el).
(A esta okazyon, i mismo si no se avla de el en la revista Yessod, vos puedo dizir ke egziste tambyen un otro sityo intitolado Dreuz.info, ke se dize “amerikano frankofono, kristyano, pro-israelyano i neo-konservador, kontra los ekstremos i el rasismo”. Esto dicho, ay yene unos kuantos djudyos ke eskriven en este sityo, ama es vedra ke la mayoriya son kristyanos.)
Otro artikolo konsagrado a kristyanas ke ovran para el keren hayessod de Fransya: la una dize ke su amor para Israel i el puevlo djudyo le vino de suyo por sus meldaduras, komo el livro de Anna Frank i otros. I tuvo un tal asko de la manera ke las gazetas fransezas avlavan de Israel a propozito de Gaza, ke kijo irse en Israel, lo ke izo mas de diez vezes.
La otra kristyana, ke bive en Bretagne, teniya una kuryozita verso estos djudyos ke no ay en Bretagne. Se va munchas vezes en Israel para ambezarse el ebreo, i en Fransya se aze amiga kon su profesora israelyana de ebreo. Agora kuando se va en Israel, es orguyoza de entender lo ke se dize a 70%. Ande mora, tyene de luchar para defender los djudyos i Israel.
Otro artikolo de Florence i Francis Kaufmann, ke organizan viajes en Israel para los non-djudyos, kijo dizir los kristyanos. Estos eskriven para dizir sus kontentez de lo ke vyeron.
Otro artikolo sovre Frère Olivier, un papaz vestido de blanko ke bive desde 1977 en Israel, en la Abbaiya de Abu-Gosh (kazal arabo de Israel). El tomo la nasyonalidad israelyana ke resivyo, dize, kon muncha onor. El ovra para el aserkamyento entre kristyanos, djudyos i muzulmanos.
Otro i ultimo artikolo: una entrevista kon el kantador franses Michel Fugain, ke se dize “el goy el mas djudyo de Paris” porke kuando era mansevo fue muy amigo – i dainda lo keda – kon una famiya djudiya i se ambezo kon eyos todas las kostumbres i fyestas djudiyas. Mos dize todo el plazer ke tuvo de toparse de muevo en Israel en novyembre de este anyo i todo el byen ke pensa de este pais i de sus moradores.
Ansina se eskapa el tefter konsagrado por la revista Yessod a estos amigos goyim, ama yo no kyero eskapar mi emisyon sin akodrarvos la memorya de los ke vinyeron ayudar a Israel en 1948 kuando era atakado de todas partes por armadas enemigas. Kuando ize mi emisyon sovre los veluntaryos ajenos en Israel en oktovre 2011, vos avli de Thadée Diffre, un katoliko ke komando a los veluntaryos fransezes venidos komo el en 1948 para luchar al lado de Tsahal, i en vedra no al lado ama azyendo parte de Tsahal.
Todos konosemos a amigos ke non son djudyos i ke son al lado de mozotros. Ke sean aki todos rengrasyados.
Al djueves i al anyo ke vyene, si kyere el Dyo!
Edmond Cohen
Paris – Fransya
Paris – Fransya
[Orijen: www.esefarad.com]
Sem comentários:
Enviar um comentário