L’FN demanda a la Comission Europèa de se posicionar contra l’independéncia de Catalonha e Aran

Louis Aliot ne pausèt dimècres una question escricha a la Comission Europèa

Louis Aliot, vicepresident del Front Nacional, companh sentimental de Marine Le Pen e cap de l’oposicion del conselh municipal de Perpinhan (Catalonha), dins sa foncion d’eurodeputat, pausèt dimècres una question escricha a la Comission Europèa sus l’independéncia de Catalonha, çò rapòrta La Clau e Vilaweb.

Aliot afirma que lo sentiment independentista “es clarament minoritari en vòtes en Catalonha”; mençona un “periòde de granda instabilitat en Espanha” e precisa que “lo govèrn espanhòl es opausat a las velleïtats separatistas e extremistas”. L’ultradrechista demanda a la Comission Europèa “se pretend sosténer lo govèrn espanhòl dins sa volontat de manténer l’unitat d’Espanha o ben, al contrari, s’espèra de dobrir un dialòg amb lo nòu cap del govèrn independentista catalan”.

Aliot pausa tanben la question de l’adesion d’una Catalonha independenta a l’UE: “Se l’accès unilateral de Catalonha a l’independéncia significariá, pel nòu estat, una sortida immediata de l’UE?”

Es pas lo primèr còp que Louis Aliot se manifèsta fermament contra l’independéncia de Catalonha. 

[Poblejat dins www.jornalet.com]