L’aragonés e lo catalan an recuperat lor dignitat en Aragon

Aquelas lengas recuperaràn lors noms e lors reconeissenças del temps que se cèrca d’abolir la lei polemica sus las lengas de 2013, que liquidava practicament las lengas autoctònas

Las Corts d’Aragon an presentat aquesta setmana un emendament a la lei de las lengas, ont l’aragonés e lo catalan recuperaràn lors noms. Dempuèi 2013, aquelas lengas èran oficialament nomenadas per d’eufemismes estonants: l’aragonés se nomenava LAPAPYP, sigla espanhòla per “lenga aragonesa pròpria dels airals pirenencs e prepirenencs”, e lo catalan se nomenava LAPAO, sigla espanhòla de “lenga aragonesa pròpria de l’airal oriental”.

 

Aquel emendament, que compta amb lo sosten del Partit Socialista (PSÒE), de Podèm, de Junta Aragonesista (CHA) e d’Esquèrra Unida, es lo primièr pas per l’abrogacion de la polemica lei de las lengas que l’aviá aprovada lo govèrn precedent, del Partit Popular (PP) amb lo sosten del Partit Aragonés Regionalista (PAR). Aquela lei de las lengas d’Aragon, aprovada en 2013, liquidava practicament tant lo catalan coma l’aragonés e los daissèt sens cap de sòrta de proteccion de part de l’administracion. Lo nòu president, Javier Lambán (PSÒE), anoncièt ja l’estiu passat qu’aboliriá la lei e que recuperariá la lei de 2009, que reconeissiá, per exemple, l’existéncia de l’aragonés e del catalan malgrat que i mantenguèsse l’espanhòl coma sola lenga oficiala. 

[Poblejat dins www.jornalet.com]