L’occitanista Mireia Boya pòt venir deputada al Parlament de Catalonha e Aran

Ramon Usall, deputat de la CUP per Lhèida, quita sa carga per de rasons de santat. Boya es la seguenta de la lista e a la fin del mes decidirà s’accèpta

La consultanta environamentala aranesa Mireia Boya, qu’es collaboradora de Jornalet, pòt venir deputada al Parlament de Catalonha e Aran lo mes de genièr que ven. Lo deputat de la Candidatura d’Unitat Populara (CUP) al Parlament de Catalonha e Aran per la demarcacion electorala de Lhèida, Ramon Usall, a anonciat que quitarà sa carga al mes de genièr: “per de rasons personalas —per santat personala e familiala, ausariái precisar—”, çò a dich. Boya es al numèro dos de la lista electorala e ven a ela de prene la carga.

 

Boya decidirà a la fin de decembre s’accèpta. Coma o a dich a la redaccion de Jornalet, “que prenerè era decision en foncion de çò que se decidisque ena Assemblada de dimenge que ven”. En aquela assemblada los militants e simpatizants de la CUP decidiràn se sostenon l’investidura d’Artur Mas coma president de la Generalitat de Catalonha e s’asseguran la formacion d’un govèrn en Catalonha.

 

 

Defendre la nacion occitana en Catalonha

 

Durant la campanha electorala, Boya faguèt totas sas intervencions en occitan, sovent davant l’estonament dels jornalistas presents. “Pensi que i deu auer aranesi en aguest procès d’independéncia entà qu’era nacion occitana i sigue representada”, çò diguèt a Jornalet. E mai, Boya precisèt que “se i a aranesi que cren qu’era independéncia ei çò de melhor entà Catalonha e Aran, e tanben entà tota Occitània, cau dar un pas tà deuant damb tot açò des dera esquèrra rompedurista”.

 

A l’ora d’ara i a ja un deputat aranés al Parlament de Catalonha, e mai se parla pas occitan; se tracta de Javier Rivas de Ciutadans. Mas la preséncia de Mireia Boya assegurariá que se parlèsse en aranés dins la cambra, coma s’es fach dins las doas legislaturas precedentas amb Francés Boya (PSC), deputat entre 1999 e 2010, e Àlex Moga (CDC), entre 2012 e 2015.

 

 

---

Barcelona TV - #aranésoc: Mireia Boya analisa los resultats electorals en Aran

 

 

[Poblejat dins www.jornalet.com]