L’album de rap en occitan Expression Verbau se pòt descargar en linha

L’artista aranés Crazy Álvarez ven de partejar gratuitament son trabalh

Crazy Álvarez

Lo musician aranés Crazy Álvarez parteja gratuitament sus Internet son trabalh de rap en occitan, Expression Verbau, eissit de l’espectacle omonim que se debanèt a Vielha l’11 d’octòbre passat. L’artista ne parlava dins una entrevista per Jornalet.

L’album conten uèch tèmas de rap en occitan e un de bilingüe en occitan e galèc amb la collaboracion del rapaire Mijha GalEgo. S’es enregistrat als estudis de VA Records e masterizat en Panico Auditivo.

Crazy Álvarez, escais de Tònho Barrau, es un membre actiu de la còla SHHNHC (Sin Hip Hop No Hay Crew), qu’an portat aquel movement cultural en Aran.

L’hip hop es un movement artistic que nasquèt al quartièr sud del Bronx nòvayorkés. Se basa sus quatre aspèctes culturals: lo cant mai conegut coma rap (rapping o MCing), lo ditgeiisme (DJing o turntablism), la dança (breakdancing o bboying) e lo grafiti. Mas tanben se manifèsta dins lo beatboxing (la tecnica d’imitar la musica amb la boca), l’activisme politic e lo dessenh de vestits o de complements.

L’union de dos d’aqueles elements, lo Master of Ceremony (MC) e lo ditgèi (DJ), forman l’estil musical de l’hip hop. Lo rap consistís a cantar o parlar de paraulas rimadas, acompanhadas d’un ritme repetitiu e sincopat, que normalament parlan de la vida per carrièras, de critica sociala o d’eles meteisses.

---

Podètz descargar los tèmas e las cobèrtas del disc sus aqueste ligam e podètz veire tot l’espectacle en dirècte dins los vidèos que seguisson: 

[Imatge : Hug de la Rosa - poblejat dins www.jornalet.com]