Demandan “justícia pels crimes del franquisme” 40 ans après la mòrt del dictator

L’estat espanhòl a pas jamai condemnat la dictatura que sas senténcias judiciàrias son encara en vigor

S’arriba uèi a 40 ans après la mòrt de Francisco Franco, lo dictator que governèt l’estat espanhòl pendent quatre decennis après un còp d’estat militar e una guèrra crusèla. Los crimes d’aquela dictatura son pas jamai estats condemnats per l’estat espanhòl e cap de responsable es pas estat jutjat. E mai, en Espanha las senténcias dels jutjaments franquistas rèstan legalament en vigor.

Davant aquel fach, e en escasença d’aquel anniversari, un trentenat d’associacions se son amassadas per convocar un acte massís d’omenatge a las victimas del franquisme e per demandar justícia. Un grand acamp es previst a 19h a Barcelona amb la participacion de victimas que patiguèron la repression e amb un concèrt ont los novèls cantaires interpretaràn las cançons de protèsta de l’epòca que se luchava contra lo regim de Franco.

[Poblejat dins www.jornalet.com]