L'Universitat de Perpinhan anóncia los estudis de catalan “per se preparar a l'independéncia del sud”

“Catalonha Nòrd, mas tanben França e Euròpa en general, auràn de besonh cada jorn mai d’especialistas en lenga, societat e identitat de Catalonha e dels Païses Catalans”

L'Universitat de Perpinhan es a difondre sos estudis per la sason que ven, e la publicitat que fa de sos corses de catalan manda un regard cap a l’independéncia de Catalonha Sud. “Estudiar catalan a l’Universitat de Perpinhan per preparar l’independéncia del sud”, çò ditz la publicitat de l’Institut francocatalan transfrontalièr (IFCT).

L’IFCT assegura dins sa comunicacion que l’independéncia de Catalonha pòt arribar dins qualques meses e per tant prepausa de “contenguts adaptats als besonhs de totes los que, dins lors vidas personalas o professionalas, auràn de ligams amb los catalans del sud, o pels catalans del sud qu’auràn de ligams amb lo nòrd e amb tot l’estat francés”. “Amb l’acceleracion del movement sobeiranista en Catalonha Sud (las eleccions plebiscitàrias se son convocadas), Catalonha Nòrd, mas tanben França e Euròpa en general, auràn de besonh cada jorn mai d’especialistas de la realitat catalana, auràn de besonh d’estudiants que dispausen d’una formacion superiora en lenga,  societat e identitat de Catalonha e dels Païses Catalans”, çò apond. 

[Image: IFCT - poblejat dins www.jornalet.com]