Catalonha: de bandièras de Danemarc pertot

En consequéncia de l’enebiment del drapèl independentista e de la declaracion del parlament danés en favor d’un procès democratic en Catalonha e Aran 

Pompièrs de Reus

Lo conselh electoral d’Espanha a enebit lo drapèu independentista catalan, l'estelada, dels bastiments publics en Catalonha. Fàcia a las eleccions municipalas, e a las del Conselh General d’Aran, que se celebraràn deman dimenge, e en seguissent una peticion de l’associacion espanholista Societat Civila Catalana, lo conselh electoral a considerat que l’estelada èra “incompatibla amb l’obligacion de neutralitat dels poders publics”.

 

Mantunas comunas an decidit de desobesir, e exibisson lo drapèl malgrat las menaças de la polícia. Mas dins d’autras comunas, l’estelada es estada retirada, mas an aparegut sul pic, de molons d’esteladas a las finèstras e als balcons dels ostals de l’entorn.

 

Comuna de Sant Pol de Mar

En mai d'aquò, qualques municipalitats an decidit d'exibir la bandièra de Danemarc. La declaracion del parlament danés en favor d'un procès negociat entre Catalonha e Espanha, que s’aprovèt dimars passat amb cap de vòte contra, a fach montar la demanda d’aquela bandièra, que se pòt veire cada còp mai per Catalonha tota.

 

De soslinhar que lo quite conselh electoral qu’a enebit l’estelada a pas escotadas las peticions qu’a recebudas per que se retiren de simbòls franquistas de cèrtas comunas espanhòlas.

[Poblejat dins www.jornalet.com]