Los dandis de Còngo

Lo catalan Héctor Mediavilla a retrach amb de fòtos e de vidèos los “sapaires”(sapeurs), un grop d’òmes de Brazzaville e Kinshasa apassionats per l’elegància

Lo jornal catalan Vilaweb recomanda lo trabalh del fotograf barcelonin Héctor Mediavilla suls diches “sapaires” (sapeurs), un grop de dandis que se passejan per las capitalas dels dos Còngos, Brazzaville e Kinshasa.

Son de membres de la Society of Ambianceurs and Elegant Persons o SAPE (jòc de mot ont lo francés sape tanben significa “sapatge, bèl abilhatge”). L’an passat venguèron fòrça celèbres gràcias a una campanha publicitària de la societat de bièrra Guinness, que ne soslinhava l’esperit e l’imatge dins l’encastre complèxe e complicat de la Republica de Còngo e la Republica Democratica de Còngo.

Un dels elements d’aquela campanha foguèt un documentari enregistrat per Mediavilla entitolat Sapeurs: The Men Inside The Suits, ont lo realizaire barcelonin seguissiá en Brazaville lo trajècte d’aquel “grop d’òmes extraordinaris”. I explican l’origina de la SAPE, lor estil de vida, la passion per l’imatge e l’abilhatge e cossí se restacan al movement.

Sul sit de Mediavilla i a tanben una galariá de fotografias (primièra e segonda partidas) del sieu sojorn amb los sapaires. 

[Poblejat dins www.jornalet.com]