La catalanofobia espanhòla dins los malhums socials

En escasença de la tragèdia aeriana del Pueg dels Tres Evescats, se multipliquèron de tweets anticatalans

Pauc coneguda en defòra de l’estat espanhòl, la catalanofobia quita pas de pojar, çò sembla. S’atròba tradicionalament dins lo domeni de las badinadas, que se trufan dels catalans per una supausada avarícia, coma los franceses se trufan dels bèlgas per una pretenduda simplesa.

Totun, s’obsèrva de mai en mai de fenomèns d’asirança que supèran l’umor mai o mens dobtós. Per exemple, Armando Robles, lo presentaire d’una emission del jornal en linha d’ultradrecha Alerta Digital, comparèt a de pòrcs, fa gaire, los catalans e los bascos que vendrián a l’estadi assistir a la finala bascocatalana de la Copa del Rei de fotbòl; malgrat la menaça d’una multa de 60 000 èuros, insistiguèt, en tot dire que los pòrcs s’ameritavan pas d’èsser comparats a de catalans o de bascos, e qu’amb Franco, i auriá pas agut aquel “linchatge mediatic”.

Lo tragic escrachament de l’A320 de Germanwings en Occitània, al Pueg dels Tres Evescats, lo 24 de març, a fach espelir un gra suplementari de catalanofobia, aqueste còp dins los rets socials, e en particular a Twitter. Aquel jorn, se coneissiá pas encara l’identitat exacta de las 150 victimas, mas coma l’avion s’enaurava de Barcelona per aterrar a Düsseldorf, de twitterejaires espanhòls se pensèron amusants en escrivent qu’èra pas una tragèdia se l’aparelh èra plen d’alemands e, mai que mai, de catalans. Es aquesta nacionalitat qu’aguèron coma tòca màger los messatges twitterejats: “Vejam, vejam, ne fagam pas un drama, que dins l’avion viatjavan de catalans, non de personas”, “Çò de l’accident me sembla fòrça plan se i aviá de catalans dintre”, entre d’autres tristes exemples.

Conscientas del problèma, internacionalizat a causa del resson mediatic de la catastròfa, las autoritats catalanas e mai espanhòlas an denonciat a la justícia los autors dels tweets catalanofòbs, amb los conselhs dels juristas de l’associacion Drets (“Dreches”) que lucha contra aquela forma d’òdi. Ansin,  lo 25 de març, la polícia identifiquèt dètz e sèt perfils de twitterejaires.

Cèrtas, çò dels twitterejaires catalanofòbs es un signe de mai de l’incompreneson e de la tension creissenta entre Espanha e Catalonha, que benlèu culminarà lo 27 de setembre. Preveson d’efièch aquel jorn d’eleccions legislativas catalanas: se las ganhan las fòrças sobeiranistas, se proclamarà lèu l’independéncia d’aquela region ara per ara espanhòla. 

[Poblejat dins www.jornalet.com]