Envergonhats pel racisme: un vidèo que vos tresvira

L’a publicat lo Centre dels Dreches Umans de Lituània per far prene consciéncia del racisme

Lo Centre dels Dreches Umans de Lituània a fach una “experiéncia sociala” per far que lo mond prengan consciéncia del problèma del racisme. Convoquèron qualques personas a far un casting per una anóncia. Quand arribava qualqu’un al luòc convengut, lo fasián esperar dins una sala, ont rescontrava un joven òme negre que veniá d’arribar al país. Lo jove lor demandava se li podián traduire del lituan a l’anglés un tèxt que qualqu’un li aviá escrich sus sa paret de Facebook. La mina de totes eles cambiava subte quand legissián lo tèxt, qu’èra plen d’insultes racistas. E lors reaccions èran divèrsas: qualques unes li volián pas traduire los insultes; d’autres li demandavan perdon… Tot aquò s’enregistrava dins un vidèo que lo Centre dels Dreches Umans l’a difondut sus Internet.

[Poblejat dins www.jornalet.com]