L’ELÈN denóncia uèi a l’ÒNU d’abuses contra los dreches lingüistics dins l’estat espanhòl

Lo Ret Europèu per l’Egalitat Lingüistica (ELÈN) i presenta un rapòrt sus d’atacs e de discriminacions contra los parlants de l’aragonés, l’asturian, lo basco, lo catalan e lo galèc dins lo periòde 2007-2013. L’occitan i es pas comprés

Lo Ret Europèu per l’Egalitat Lingüistica (ELÈN) presenta uèi a las Nacions Unidas un rapòrt sus la discriminacion e los atacs contra de parlants de certanas lengas de l’estat espanhòl que sián pas lo castelhan. Lo document compren de cases d’atacs e de discriminacion contra los parlants de l’aragonés, l’asturian, lo basco, lo catalan e lo galèc dins lo periòde 2007-2013. Lo rapòrt compren pas l’occitan, probable per manca de denóncias dins un territòri lingüistic petit coma Aran.

La majoritat de las denóncias venon d’organismes de l’administracion de l’estat. “Los faches mòstran que los ciutadans parlant aquelas lengas son en una situacion extrèmament vulnerabla, pr’amor que tot çò que pòdon far es denonciar los abuses que patisson a las meteissas institucions que lor infligisson aqueles abuses”, çò declara lo pòrtavotz d’Iniciativa per l’Asturian.

Mas se l’asturian rapòrta 25 denóncias. Lo catalan ne rapòrta 40, que la majoritat son de discriminacions practicadas per la polícia, mai que mai al País Valencian.

Las autoritats encoratjan d’actituds “supremacistas”

Lo rapòrt de l’ELÈN explica que los cases de discriminacion arriban tanben als tribunals de justícia, ont abitualament son pas recebuts. Al contrari, se cita lo cas d’un jutge que retirèt a un paire la gàrdia de sa filha perque aquel paire li parlava en catalan per la separar de la maire.

En conclusion, lo document ditz que las autoritats espanhòlas tolèran dobèrtament, e quitament encoratjan, d’actituds “supremacistas” demest los foncionaris e agents publics. “La discriminacion contra las lengas autoctònas non castelhanas es sistemica dins l’estat espanhòl, e aquela discriminacion s’es institucionalizada”.

L’ELÈN

Lo Ret Europèu per l’Egalitat Lingüistica (ELÈN) se constituiguèt en 2011 per trabalhar sus la proteccion e promocion de las minoritats regionalas d’Euròpa e las lengas en situacion de minorizacion. Fins ara, representa 44 lengas dels 21 estats europèus.

A tanben una seccion dins l’Estat francés que trabalha per denonciar las discriminacions contra la nòstra lenga entretant.

[Poblejat dins www.jornalet.com]