Oxfam International es una confederacion internacionala d’organizacions que sa tòca es de trapar de solucions contra la pauretat e contra l’injustícia. En mai de son accion concreta en favor d’aqueles objectius, publica regularament d’estudis e de rapòrts en ligason amb sos aisses de trabalh.
Ièr diluns 19 de genièr, publiquèron un article entitolat “Riquesa: o possedir tot e ne voler encara mai”, signat de la cercaira Deborah Hardoon.
Aquel article mòstra qualques elements impressionants:
— En 2016, l’1% de la populacion del planeta possedirà aitant de riquesa coma los 99% de rèsta. En chifras, aquò vòl dire que 72 milions de personas possedisson tant coma las autras 6 480 milions de personas.
— La fortuna mejana d’aquel elèit d’un 1% es de 2,7 milions de dolars per adulte.
— Aquel 1% mai ric del planeta possedissián “sonque” l’equivalent del 44% de la riquesa mondiala en 2009, e del 48% en 2014. L’estudi prevei qu’arribaràn a possedir la mitat de la riquesa planetària dins un an.
— 85 personas son mai ricas que la mitat del planeta, siá 3 600 milions de personas.
Qu’un pichon nombre de personas possediscan de riquesas insensadas aquò es una trista constanta de l’istòria umana, mas l’element nòu es la pojada d’aqueste inegalitarisme que sembla de s’installar d’un biais duradís, progressiu e institucional. Oxfam Internacional fa de proposicions per luchar contra un estat que segon eles, es pas una fatalitat. Assaja de far valer nòu mesuras al prèp dels govèrns mondials per far demesir aquesta injustícia. An lançat la campanha de sensibilizacion Even it up.
[Poblejat dins www.jornalet.com]
Sem comentários:
Enviar um comentário