Estrasborg: cridèron “Elsass frei” (“Alsàcia liura”)

Durant la tantossada del 23 de novembre, organizèron una manifestacion contra la fusion d’Alsàcia. 

La fusion anonciada, dins la reforma territoriala francesa, d’Alsàcia amb las regions  Lorena e Champanha-Ardena, sembla que la populacion alsaciana l’accèpte mal e que se despèrte l’autonomisme.

De biais espontanèu e coma consequéncia d’una crida suls malhums socials –al contrari del recampament de l’11 d’octòbre organizat per l’UMP–, aperaquí un milierat d’alsacians, benlèu un pauc mai,  se recampèron dins la capitala alsaciana, sovent joves mas vestits de la còfa e del costum tradicionals, per protestar contra un projècte de fusion que per fòrça gents significa lo risc de desaparicion d’Alsàcia.

Lo passacarièra percorrèt de luòcs simbolics d’Estrasborg, coma la catedrala, la prefectura e lo Teatre Nacional d’Estraborg, qu’albergava lo Parlament d’Alsàcia-Lorena, quand Alsàcia e Mosèla èran de territòris alemands. Portavan massissament la bandièra tradicionala alsaciana, lo Rot un Wiss (“Roge e Blanc”, identic a las bandièras de Mónegue e d’Indonesia), levèron de drapèls franceses a d’edificis publics e cridèron “Elsass frei” (“Alsàcia liura”).

Malgrat la promessa per un vòte unanim dels deputats franceses qu’Estrasborg foguèra la capitala de la region nòva, la fusion d’Alsàcia e las declaracions del primièr ministre Manuel, que neguèt lo 14 d’octòbre passat, a l’Assemblada Estatala, l’existéncia del pòble alsacian, provòcan de fòrtas reaccions popularas.

Se lo jacobinisme es anat tròp luènh?

GJB

[Poblejat dins www.jornalet.com]