La mapa dels movements independentistas e autonomistas d’Euròpa

Segon Business Insider, un quarantenat de nacions europèas cèrcan mai d’autogovèrn, dont Occitània

Malgrat lo resultat final, lo referendum sus l’independéncia d’Escòcia a refortit los autres movements independentistas d’Euròpa, convencuts amb l’exemple dels govèrns escocés e britanic que los procèsses de liberacion nacionala se pòdon resòlver pacificament e democratica. La publicacion Business Insider se demandèt fa qualques setmanas quals èran totes aqueles movements separatistas e autonomistas europèus, e i respondèt amb aquesta mapa.

Basada sus las nacions e regions representadas dins lo grop politic Aliança Liura Europèa (del Parlament Europèu), la mapa mòstra un quarantenat de “partits progressistas nacionalistas, regionalistas e autonomistas de tota l’Union Europèa”, d’Occitània, de Catalonha e tanben del Bascoat, Sardenha, Flandra, Venèt, Sud-Tiròl, Bretanha, Frisa e Bavièra.

[Poblejat dins www.jornalet.com]