Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por egzemplo, vos ize el 15 de septyembre de 2011, ay dunke komo kaji dos anyos, una emisyon intitolada “Salvadores de Djudyos”, ande vos avli, entre otros, del kampeon italyano de siklismo Gino Bartali.
Vos dishe lo ke sige:
” Kada uno ke se interessa al Tour de France se akodra de un grande kampeon italyano de bisikleta, yamado Gino Bartali, ke gano el Tour de France dos vezes (1938 i 1948) i el giro d’Italia tres vezes. Yo, en todo kavzo, me akodro muy byen de el. Yo teniya onze anyos kuando gano en 1948 i me interesava muncho, en este tyempo, al Tour de France.
Este grande kampeon se muryo en 2000 a la edad de 86 anyos. Tres anyos mas despues, en 2003, se muryo tambyen un djudyo yamado Giorgio Nissim. Sus ijos, mirando en los papeles del defunto, toparon ke este Nissim aviya organizado durante la gerra, kon el ayudo de relijyozos katolikos, una red para azer fuyir de Italia a syenes de djudyos (800 en todo) grasyas a falsos papeles. I kyen transportava los falsos papeles de un lado a otro? Gino Bartali, ke iva por karreteras i montanyas para su entrenamyento sportivo. Dinguno pensava ke en vedra el kampeon transportava falsos papeles eskondidos en su bisikleta.
Yene fue sospechado por las Kamizas Negras porke se vido ke frekuentava monasteryos konosidos por luchar kontra los fasistos. Bartali fue yevado a la Villa Trieste, famoza por sus interrogatoryos i sus torturas, i aya le ordenaron de no irse mas a estos monasteryos. El respondyo ke dinguno podiya impedirle de korrer ande keriya, i kontinuo su aksyon, savyendo ke era tan famozo ke dinguno tendriya la ozadiya de meterlo en prezo.
Kuando s’eskapo la gerra, Bartali no disho a dingunos lo ke aviya echo para los djudyos, i se muryo sin ke se sepa. Son los ijos de Giorgio Nissim ke salyeron la koza kuando la deskuvrieron tres anyos despues de su muerte”.
Esto es lo ke vos aviya dicho ay dos anyos de esto, en esta emisyon.
Halbuki, me ambezi grasyas a mi amigo Jose Molho, ke nombro munchas vezes aki para rengrasyarlo, ke esta istorya no era kompleta. I esto es la kulpa de Bartali el mismo, ke nunka kijo avlar de lo ke aviya echo. Ya vos konti komo son los ijos de un djudyo yamado Giorgio Nissim, ke toparon despues de la muerte de sus padre papeles amostrando komo ayudo a unos 800 djudyos de eskabuyirse de Italia. Ama otros bushkaron mas, i un syerto Adam Musevich eskapo por ambezarse de un djudyo yamado Giorgio Goldenberg ke aviya sido eskondido tres mezes en 1944 en el mahsen de un syerto Armandino Sizzi, el kual era el primo i el mekano de Gino Bartali, ke aviya venido a verlo.
Por esto, i esto tambyen es koza mueva, Yad Vashem vyene de dar la medaya de los Djustos a Gino Bartali.
No se si Armandino Sizzi, el ke eskondyo al djudyo, obtuvo tambyen una medaya. Me parese ke la meresiya tambyen, syendo ke tomo, sovre este echo, mas rizikos ke Bartali.
Esto dicho, este Bartali ke asta su muerte nunka konto a dingunos lo ke aviya echo, merese otra medaya, la de la modestiya. Ama es vedra ke lo mas de los Djustos fueron ansina, muy modestos.
En esta emisyon sovre salvadores de djudyos ande avli de Bartali, avli tambyen de otros salvadores, tres polakos i un alman: Leitz.
Entremyentres me ambezi, kaji en mismo tyempo ke la medaya de Bartali, ke otrun Djusto obtuvo una medaya de Yad Vashem. Es un arabo ejipsyano, yamado Mohamed Helmy. Este ombre se topo ser mediko en Berlin durante la Gerra. El eskondyo en Berlin mismo, en una kavanya ke teniya, a una mujer djudiya de 21 anyos, Anna Boros Gutman, i esto del 10 marso 1942 astal kavo de la gerra i la kaida de Berlin en 1945. Kaliya tener muncho dikat porke la Gestapo ya saviya ke el Doktor Helmy era su mediko, i tambyen ke el teniya esta kavanya.
De otra parte, la Gestapo saviya tambyen ke el era opozante al nazismo, i por esto aviya sido proibido de lavorar para la salud puvlika, i tambyen de kazarse kon la mujer ke teniya por novya, una Almana yamada Frieda Szturmann. Aviya mismo sido aferrado kon otros Ejipsyanos en 1939, i despues liberado, ama yene la polisiya teniya un ojo sovre el. Kuando la sekana veniya a ser de maziya fuerte, tomava a su protejada eskondida i la yevava para unos kuantos diyas ande amigos.
En mizmo tyempo, Helmy ayudo i kuro a la madre de Anna i su sigundo marido. En kuanto a su vava, eya kedo un anyo eskondida ande la novya Szturmann, komyendo kon eya lo poko ke teniya para komer.
Al kavo de la gerra, el mediko pudo kazarse kon su novya, i los kuatro djudyos pudyeron irsen en Amerika, sin olvidar a sus dos salvadores. En los anyos 1950 i 1960 embiyaron letras al Senado de Berlin para kontar lo ke aviyan echo, i estas letras an sido topadas en los arshivos por un bushkador alman, ke las embiyo a Yad Vashem. Esta organizasyon esta agora bushkando erederos para remeterles la medaya.
A propozito del ayudo de syertos muzulmanes a los djudyos durante la gerra, ya vos avli del konsul de Turkiya en Rhodes, Selahattin Ülkümen, i del konsul de Iran en Paris en 1941, Abdol Hossein Sardari, en una emisyon ke ize el 5 de marso 2009, intitolada Wallenberg i otros diplomatos djustos. Ama ni el uno ni el otro muzulmano eran arabos.
A la rovez, no vos avli de un arabo aljeryano, Si Khaddour Ben Ghabrit, ke era durante la gerra el kapo de la Gran Meshkita de Paris. Asigun syertos istoryanos, varyas famiyas djudiyas fueron eskondidas en la meshkita i ayudadas, dandoles sertifikatos de muzulmanos, para fuir de la zona okupada. Todos los istoryanos no son d’akodro sovre los shifros, ama ay un doktor, Albert Assouline, ke atestiguo en una emisyon de France 3 intitolada “La Mosquée de Paris, une Résistance oubliée” (la meshkita de Paris, una rezistansya olvidada) ke el mismo, Assouline, embiyo 1.600 kartas a la Meshkita para los djudyos eskondidos aya. Por tanto, el direktor de oy de la Meshkita, el Doktor Dalil Boubakeur, disho su shupe sovre esta istorya.
En 2005, se izo una yamada a testigos djudyos salvados por la Meshkita, ama no konosko el rezultado de esta yamada.
Salyo tambyen en 2011 un filmo de Ismael Ferroukhi “Les hommes libres”, ke mos konta komo un kantador sozde arabo, Salim Halali, en vedra djudyo yamado Simon Halali, obtuvo de Si Khaddour Ben Ghabrit papeles de muzulmano ke lo salvaron de los Almanes durante la gerra.
I el anyo pasado, 2012, en un livro intitolado “L’étoile jaune et le croissant” (la estreya amariya i la medyaluna) el eskrivano Mohammed Aïssaoui dize ke lavoro dos anyos i medyo i topo testigos djudyos de la aksyon sekreta de Si Khaddour Ben Ghabrit. Da por egzemplos el padre (adoptivo) de Philippe Bouvard i la madre de Serge Klarsfeld.
Esto todo aze un komplemento a lo ke yo aviya dicho en mi emisyon sovre Ülkuümen i Sardari. I mos amostra ke, puede ser no son munchos, ama yene ay muzulmanos, i mismo muzulmanos arabos, ke fueron, i algunos son dainda, amistozos kon los djudyos. El mas konosido en Fransya es el imam de Drancy (la sivdad ande aviya el terrivle kampo de ande fueron embiyados a Auschwitz miles i miles de djudyos) imam ke se yama Hassen Chalgoumi. Malorozamente, deve bivir protejado por guardyanes del puerpo. Indimas kale saludar su koraje.
Esto dicho, komo keda dainda tyempo antes de la fin de la emisyon, vo trokar de lakirdi i avlarvos de los gauchos djudyos, syendo ke vide este alhad a la televizyon una emisyon del haham Eisenberg en parte konsagrada a eyos, a partir de un livro eskrito por David Muhlmann intitolado “Territoires de l’exil juif” (territoryos del galuth djudyo). En este livro Muhlmann mos konta en la primera parte la aventura del Birobidjan, (de la kuala ya vos avli en una emisyon del 15 de avril 2010 intitolada Birobidjan) i la sigunda parte de su livro es konsagrada a lo ke fue yamado por el eskrivano Alberto Gerchunoff “Los gauchos judios”.
Kale saver ke, syendo los terrivles pogromes de Evropa del este al kavo del siglo 19, munchos djudyos rusos se fuyeron, i syertos aprovecharon ke el Estado de Arjentina, dirijido por Nicolas Avellaneda, en esta misma epoka, tomo el 19 de oktovre 1876 una ley “sovre la immigrasyon i la kolonizasyon”, avriyendo las puertas del pais a los ke keriyan venir.
En vedra, asigun lo ke meldi sovre Wikipedia, los djudyos de Podolia i de Bessarabia no teniyan idea de irsen en Arjentina. Sus idea era de ir en Palestina, i por esto, pensaron demandar ayudo al baron Edmond de Rothschild, famozo syonisto (afillu si el nombre no egzistiya dainda) ke biviya en Paris. Dunke se meten d’akodro para embiyar en Paris a un syerto Eliezer Hauffmann para ver a este Rothschild. Ama Hauffmann no reushe en su misyon, syendo ke parese ke Rothschild ni mismo lo resivyo, no se save deke.
Kualo azer? Hauffmann se ambeza ke ay una posibilidad de ir en Arjentina. Se ambeza ke un syerto Rafael Hernandez vende tyerras ke le pertenesen i ke se topan en Nueva Plata, en la provinsya de Buenos Aires. Un kontrato es firmado por Hauffmann, reprezentando los djudyos; i, en agosto 1889, 130 famiyas toman el vapor Weser, i en vez de ir en Palestina, se van en Arjentina, i ayegan el 14 de agosto en Buenos Aires. Aya aparese ke todo lo ke disho i aprometyo Hernandez era falso. No ay las tyerras merkadas a Hernandez. Los djudyos se van a ver a un avokato, Pedro Palacios, i el, tenyendo una grande tyerra en la provinsya de Santa Fe, les vende un pedaso. Los djudyos firman un muevo kontrato, i de muevo se azen enganyar: nada de lo ke a sido aprometido en el kontrato – animales, instrumentos, ets – les es remetido. Se topan en una situasyon trajika. No tyenen nada de komer; 64 kriaturas mueren i son enterados aya.
La koza se save, i el governo arjentino yama a un mediko de Roumaniya, el Doktor Wilhelm Loewenthal, ke se topa en Paris, para ver lo ke se puede azer para kurarlos. Loewenthal se va en Arjentina, se da kuenta de lo ke se pasa, i abolta en Paris para fundar una asosyasyon, la Jewish Colonisation Association (JCA). Esta asosyasyon es fundada en 1891 en Londres i es el Baron Maurice de Hirsch, rikinyon bankero djudyo de Almanya, ke va dar las paras i okuparse de salvar a los Djudyos de Rusiya. Komo a pedrido su ijo Lucien, aze todo en nombre de su ijo muerto Lucien de Hirsch.
La asosyasyon va dar a kada famiya una asyenda de 50 a 100 ektaros por el presyo de 2.000 dolares por famiya. Los djudyos yaman a la sivdad Kiryath Moshe, en onor de Maurice (Moshe) de Hirsh, ama va ser enrejistrada komo Moises Ville.
Despues de esta sivdadika, otras van a ser fraguadas. 42 famiyas ayegan vinyendo de Grodno (oy en Byelorusiya). Se meten en kyoyes ke yaman asigun ay moradas: Las kuatro kazas, las sesh kazas, las dodje kazas, las ventikuatro kazas.
Despues vyenen tres grupos de 104 famiyas en todo en los kazales de Wavelberg al norte de Moises Ville, Virginia al este i Juanita al oeste. En 1901, otro grupo de 31 famiyas venidas de Byalistok (oy en Polonya) kon el eskrivano yidisch Gedaliah Bublick se instala en el kazal de Zadok Kahn, ansina yamado en onor del haham bashi de Fransya.
 |
| Gauchos judíos |
Kon los terrivles pogromes de Kichenev, otros vyenen de Bessarabia en 1903? i se instalan en Mutchnik i otros en Monigotes en 1905. Antes de la Gerra son los refujyados almanes ke vyenen en el sektor de Capivara, i tambyen despues de la gerra.
Son estos kazalinos ke fueron yamados los gauchos djudyos por Alberto Gerchunoff en un livro ke eskrivyo en 1910.
En los anyos 1940, el numero de djudyos en Moises Ville i los kazales al rededor aserka los 5.000, sea 90% de la povlasyon total.
Ama despues, a poko a poko, los djudyos se van a ir sea en Israel sea en las grandes sivdades, i en 2001 eran solo 12% de la povlasyon tota. EN 2005, por la primera vez, el mayor de Moises Ville no es mas djudyo.
I para eskapar esta emisyon, vos vo meldar las palavras de una kantika eskrita por Jevel Katz, ke se muryo en 1940:
In Mozesvil, mayn kleyn shtetele,
Mozesvil, mayn sheyn heymele,
Bist a yidishe medine,
Bist a shtolts far Argentine,
Mozesvil
Mozesvil, mayn sheyn heymele,
Bist a yidishe medine,
Bist a shtolts far Argentine,
Mozesvil
Moises Ville, mi chiko kazaliko,
Moises Ville, mi ermozo ogariko,
Sos un estado djudyo,
Sos un orguyo para Argentina,
Moises Ville.
Moises Ville, mi ermozo ogariko,
Sos un estado djudyo,
Sos un orguyo para Argentina,
Moises Ville.
Al djueves ke vyene, si kyere el Dyo!
Edmond Cohen
Edmond Cohen
[Orijen: www.esefarad.com]
Sem comentários:
Enviar um comentário