Bolívia: Morales ganha l’eleccion e dedica la victòria als govèrns antiimperialistas

L’actual president de Bolívia, Evo Morales, a ganhat las eleccions presidencialas amb aperaquí un 60% dels vòtes, segon los sondatges faches als burèus de vòte. Se se confirma aquel resultat a l’escrutini, Morales obtendrà son tresen mandat, per cinc ans de mai, sens besonh d’un segond torn, pr’amor qu’auriá despassat lo 50% dels vòtes.

“Aqueste trionf es dedicat a Fidel Castro, a Hugo Chávez e a totes los govèrns antiimperialistas” del Mond, çò diguèt Morales dimenge dempuèi lo balcon del Palais del Govèrn per festejar la victòria, e mai se s’espèra los resultats oficials de la Cort Suprèma Electorala.

Morales auriá ganhat dins uèch dels nòu departaments del país. Lo resultat consolida lo Movement Vèrs lo Socialisme (MAS segon sa sigla en espanhòl) e se sarra del 75% de deputats de l’Assemblada Legislativa.

Lo cap indigenista e antiimperialista auriá pas causit per azard lo 12 d’octòbre coma data de l’eleccion, Jorn de l’Ispanitat, qu’en America los pòbles originaris i remembran lor genocidi. 

[Image: Eneas de Troya - poblejat dins www.jornalet.com]