Una escòla ensenha lo LAPAO en plaça del catalan

La direccion del centre a decidit de cambiar lo nom de la matèria facultativa

L’escòla CRA Tastavins de Pena-roja —qu’es dins l’airal catalanofòn qu’administrativament aperten a Aragon— ofrís pas mai lo catalan coma matèria facultativa, mas lo LAPAO. La direccion de l’escòla o a decidit en se rambant al nom que lo govèrn d’Aragon assignèt a la lenga catalana per aquela region: “lenga aragonesa pròpria de l’airal oriental (LAPAO)”. Segon çò qu’a raportat El Punt-Avui, aquela escòla mandèt una letra als parents perque signen se vòlon que lors enfants estúdien lo LAPAO pendent tota l’educacion primària.

Lo programa e la professora de LAPAO son los meteisses que los de las classas de catalan. Dins aquela escòla, los escolans de primièra, tresena e cinquena aprendràn lo LAPAO, mas los de segonda, quatrena e seisena aprendràn lo catalan. Segon la direccion de l’establiment, la denominacion LAPAO es ligada amb l’obligacion de la Conselhariá de l’Educacion del Govèrn d’Aragon d’implantar la nòva lei espanhòla d’educacion dins los nivèls impars.

Aquela nòva lei de l’educacion, promoguda pel ministre José Ignacio Wert, es intrada en vigor amb l’insomission dels esenhants catalans e araneses. Segon lo quite ministre, a la tòca “d’espanholizar”, e per aquò far, establís que l’espanhòl es la sola lenga veïculara dins tot l’estat, crèa d’examens d’avaloracion centralizats a Madrid en fin de primària e segondària e redutz lo poder de las associacions de parents d’escolans.

Las matèrias restacadas a las lengas dichas cooficialas (occitan, catalan, galèc e basco) se considèran de matèrias d’especializacion opcionalas, e l’immersion en occitan es en perilh en Aran. La Generalitat de Catalonha anoncièt que n’assumiriá la desobesissença per evitar d’insomissions d’ensenhaires e per portar pas la tension dins las escòlas. 

[Poblejat dins www.jornalet.com]