Lo govèrn espanhòl menaça de suspendre l’autonomia de Catalonha per evitar lo referendum

Lo ministre espanhòl dels afars exteriors a dich ièr qu’emplegarà “totes los mejans que seràn a sa portada” per que lo vòte se faga pas

Lo ministre espanhòl dels afars estrangièrs, José Manuel García-Margallo, a avertit ièr que l’executiu espanhòl emplegarà “totes los mejans que seràn a sa portada” per empedir lo vòte sobeiranista en Catalonha. Margallo menacèt qu’o fariá “dins la lei, mas tota la lei”, çò que compren tanben la possibilitat de suspension de l’estatut d’autonomia. Margallo, que se definiguèt coma un “patriòta”, assegurèt que lo govèrn espanhòl tolerariá pas en cap de cas la secession de Catalonha e qu’aquel vòte tòca “de linhas rojas” coma “l’unitat d’Espanha e lo principi de legalitat”. “Lo principi qu’avèm jurat de defendre es de respectar la constitucion e las leis e de las far respectar”, çò diguèt lo ministre en un dejunar informatiu amb los ambaissadors de 58 païses.

Lo pòrtavotz parlamentari del Partit Popular, Alfonso Alonso, mercegèt sul pic Margallo d’aver expausat “amb clartat” la posicion del govèrn espanhòl sul referendum sobeiranista e sus las armas qu’a l’estat per l’empedir. “S’aquesta setmana i a una provocacion a la normalitat constitucionala o a la legislacion basica, lo govèrn reagirà e complirà son obligacion”, çò diguèt Alonso en conferéncia de premsa, ont remembrèt que lo govèrn espanhòl demandariá la suspension automatica de la Lei de consultas que divendres que ven deu aprovar lo Parlament de Catalonha.

Las reaccions, a Madrid, dels deputats d’Esquèrra Republicana de Catalonha (ÈRC) e del Partit Nacionalista Basco (EAJ-PNV) arribèron sul pic. Alfred Bosch, d’ÈRC, acusèt lo ministre espanhòl d’aver una actitud “intransigenta e fanatica” e se demandèt “se suspendr[iá] la democracia”. De son costat, lo pòrtapaurala del partit basco, Aitor Esteban, demandèt se lo ministre “mandariá los tancs” en Catalonha. “Aquò sona plan fòrt. Es preocupant que volgatz pas dobrir las pòrtas a la democracia ni a la liura expression dels ciutadans”, çò apondèt.

Margallo diu que l'estat està disposat a... por vilawebtv

[Poblejat dins www.jornalet.com]