La composicion del nòu govèrn francés, dich “Valls 2”, a gaireben completament oblidat Occitània. Aquesta dòcta amassada es compausada de 16 ministres e 17 secretaris d’estat a l’entorn del primièr ministre, siá un total de 34 personas.
Lo president Hollande a decidit qu’Occitània donariá sonque una ministra al govèrn de França. Es Na Sylvia Pinel, sòcia del Partit Radical d’Esquèrra (Parti Radical de Gauche). Es conselhièra regionala de la region de Miègjorn-Pirenèus. Li es balhat lo ministèri del lotjament, de l’egalitat dels territòris e de la ruralitat. L’egalitat dels territòris essent fisada a una occitana radicala d’esquèrra, caldrà pas esperar cap d’avançada institucionala o politica diferenciada pel país occitan.
Tres secretariats d’estat son fisats a d’occitans:
— Lo landés Alain Vidalies, que se cargarà dels transpòrts, de la mar e de la pesca.
— Lo tolzan Kader Arif, cargat dels ancians combatents e de la memòria
— La tolzana Carole Delga, cargada del comèrci, de l’artisanat, del consume e de l’economia sociala e solidària.
Occitània representa un 5,88% dels ministres d’aqueste govèrn. Es una chifra que se pòt comparar amb la populacion occitana que representa lo 25,75% de la populacion de l’estat francés. Se foguèsse estada respectada la representativitat dels territòris i deurián èsser 5 ministres occitans.
Sul total del govèrn (ministres + secretaris d’estat), aquestas 4 personas representan sonque l’11,76% de la còla. S’aguèsson repectat la proporcion de la populacion nòstra, Occitània deuriá téner 9 ministres. Tanben cal integrar la qualitat dels ministèris fisats a d’occitans que vertadièrament son segondaris dins la vida politica.
TL
[Poblejat dins www.jornalet.com]
Sem comentários:
Enviar um comentário