 |
| La plaça culturala Santamaría de Bogotà, ancianament arena de corrida |
Un grop de uèch novilleros colombians es en cauma de la fam dempuèi doas setmanas a l’entorn de las arenas de Bogotà per demandar al govèrn municipal de poder tornar far de corridas. Lo cònsol de la capitala de Colómbia, Gustavo Petro, enebiguèt aquel tipe d’espectacles fa dos ans e es a reformar l’arena en un centre d’espectacles perque s’i fagan “d’activitats de vida e non pas de mòrt”.
Los novilleros demandan d’èsser entenduts pel cònsol “pr’amor que nos viòlan lo drech a la liura expression, a la libertat de causir lo nòstre trabalh”. Segon los caumaires, l’enebicion de la corrida, qu’es pas enebida dins la rèsta de Colómbia, a provocat la desaparicion d’aperaquí 35 000 emplecs e de pèrdas als elevaires e als matadors.
De son costat, de fonts de la municipalitat an avertit que la corrida tornarà pas a Bogotà tant que Gustavo Petro serà cònsol.
Petro enebiguèt la corrida a Bogotà en junh de 2012, una mesura qu’a levat polemica demest los afeccionats mas qu’es estada plan benveguda pels defensors dels animals, e —segur— pels taures. Aital seguiguèt l’exemple de Catalonha qu’enebiguèt la corrida en 2010 e de las Illas Canàrias que l’avián ja enebida en 1991 amb una lei de proteccion dels animals. Per contra, l’estat francés la declarèt ben d’interès cultural en abril de 2011.
[Image: © Carlos Andrés Prada Durán - poblejat dins www.jornalet.com]
Sem comentários:
Enviar um comentário