En l’illa d’Astypalaia, en Dodecanès, l’arqueològ Andreas Vlachopoulos a fach la descobèrta d’una ròca e dos petroglifs que representan dos vièches e l’inscripcion “Nikasitimos montava Timion aicí” (Νικασίτιμος οἶφε Τιμίονα). L’inscripcion data del sègle V o VI abans lo Crist, segon çò que rapòrta The Guardian.
Nikasitimos e Timion èran dos òmes
Timion es un nom d’òme. Nikasitimos es un nom d’òme tanben. Se pòt que foguèsson soldats. La ròca se tròba al ponch mai naut d’un promontòri que permet una vista panoramica d’una baia. Es fòrça probable qu’una garnison de soldats foguèsse estada postada ailà.
Vlachopoulos declarèt al jornal britanic The Guardian: “es sabut qu’en la Grècia antica lo desir sexual entre òmes èra pas un tabó”, mas aqueste grafiti es inusual, “ditz clarament qu’aqueles dos òmes estavan e faguèron l’amor pendent un long periòde de temps, en metent l’enfasi en l’acte sexual d’una manièra plan inusuala per çò de l’art erotic.”
L’inscripcion es perfiècha, aquela persona prenguèt un brave temps per escriure son messatge. E aquò se passèt en una illa luenchenca un pauc abans lo sègle d’aur atenenc. Mas abans Pericles, almens dempuèi la segonda mitat del sègle VI, la capacitat de legir e d’escriure èra pro socializada. E la tolerància sexuala tanben, a çò que se vei.
Puèi venguèt lo cristianisme
Trobam dins la letra de l’apòstol Joan als romans: “Per açò, Diu les a deishat enes sues passions vergonhoses. Es hemnes an cambiat er us naturau deth sèxe per un us contra natura, e semblantament es òmes deishant era relacion naturau tamb era hemna, s’an ahlamat de passion es uns pes auti e an cometut actes infamants òmes tamb òmes, realament an recebut era recompensa que meritaue eth sòn error!”[1] (Rm 1, 26-27)
En 342, los emperaires Constantin e Constanci depausèron una lei per punir l’omosexualitat masculina passiva per mejan de la castracion.
En 390, aquela lei foguèt melhorada per Teodòsi, que permetèt de cremar al lenhièr los omosexuals passius que trabalhavan als bordèls.
En 533, Justinian puniguèt amb sanament e lenhièr tot acte omosexual passiu e actiu.
L’istòria es longa. Podèm clavar, per dire una data a l’azard Bautesar, amb la manifestacion del 26 de mai de 2013 contra lo matrimòni omosexual a París.
Nikasitimos e Timion aguèron l’astre de se poder estalviar tot aquò.
Manèl Zabala
______
[1] Nau Testament, virat ar aranés dera Bíblia catalana interconfessionau per Jusèp Amiell.
[Image: http://www.theguardian.com/science/2014/jul/06/worlds-earliest-erotic-graffiti-astypalaia-classical-greece - poblejat dins www.jornalet.com]
Sem comentários:
Enviar um comentário