Lo primièr ministre francés, lo catalan Manuel Valls, a dich qu’un estat catalan independent seriá un perilh per la rèsta d’Euròpa e a reclamat una Espanha fòrta e unida. Aquelas declaracions meritan un editorial de la part del nòstre jornal, per una seguida de rasons qu’explicarem sul pic.
En primièr luòc, Valls dralha, insulta e mesprèsa lo sentiment del pòble catalan e sa volontat de s’exprimir democraticament. Qual es Manuel Valls per dire se los catalans pòdon èsser independents o pas? O deurián pas decidir, a las urnas, los quites catalans? Segon lo titular del Palais de Matignon es pas aital: es la volontat d’aqueles estats-nacion vièlhs e calucs, coma França e Espanha, que deu dictar l’avenir de las nacions totas. Aquela manièra de pensar es pas modèrna: al contrari, es anciana, obsolèta e digna dels tempses del despotisme illustrat.
En segond luòc, nos inquieta l’alinhament incondicional del primièr ministre francés amb lo govèrn espanhòl. Coma se sap, Espanha es un dels pauques estats de l’Union Europèa ont recentament an illegalizat de partits, an barrat de jornals, an recebut de condemnas per la violacion dels dreches umans, ont la democracia es limitada e ont l’armada a lo mandat constitucional de preservar l’unitat d’Espanha a quin que siá prètz... En prenent en compte qu’en França i a de centenats de milièrs de franceses d’origina espanhòla a causa de las guèrras, la repression e la misèria (coma es lo cas de sa collèga de partit Anne Hidalgo, per ne citar una), es pas gaire tranquillizant que París cèrque d’alianças d’aquela sòrta.
Fin finala, la tresena consideracion fa referéncia a la condicion inerenta, naturala, inevitabla e pròpria de catalan qu’a lo primièr ministre. Perque la realitat es aquesta: Manuel Valls ES catalan e o serà totjorn; e mai s’ARA ES francés coma poiriá ÈSSER suedés se foguèsse anat demorar en Suècia o comaSERIÁ canadian se foguèsse anat en Canadà. Èsser catalan li es estructural; èsser francés li es conjontural. En consequéncia, nos alarma que la “vergonha” pòsca arribar fins al ponch de refusar als tieus conciutadans çò que Valls reclama per los palestinians o per d’autras minoritats.
[Poblejat dins www.jornalet.com]
Sem comentários:
Enviar um comentário