Eth Parlament de Catalonha que comence a tramitar era Lei d’Aran

Ne resultarà ua lei qu’establirà eth regim especiau pròpri deth país occitan damb era tòca de protegir-ne eth “caractèr singular”, es “drets istorics e era identitat”

Eth president dera Generalitat de Catalonha,
Artur Mas, que felicite ath Sindic d'Aran, Carlos Barrera,
e ath deputat aranés Àlex Moga, dempús dera session en Parlament

A sies dies dera Hèsta d’Aran, se parlèc un aute còp occitan en Parlament de Catalonha, aguest viatge en prumèr debat dera proposicion de "Lei d’Aran", ua lei qu’establís eth regim especiau pròpri deth país occitan damb era tòca de protegir-ne eth “caractèr singular”, es “drets istorics e era identitat”. Era lei que definís Aran coma “entitat territoriau singulara” qu’a “personalitat juridica pròpria e plea capacitat e autonomia”. Qu’a eth sosten de totes es fòrces politiques deth parlament catalan.

 

 

“Un exemple unic en Euròpa”

 

“Catalonha e Aran son un exemple unic en Euròpa de reconeishement dera riquesa culturau e lingüistica”, çò diguec eth deputat aranés e baile de Vielha, Àlex Moga. Ena sua intervencion en aranés, Moga soslinhèc que “se renauissen es relacions entre Catalonha e Aran, relacions de tu a tu, que respècten eth passat, enfortissen eth present e projècten eth futur”.

 

De hèt, aguesta lei “qu’arreconeish eth dret e era realitat dera organizacion institucionau, politica e administrativa d’Aran e ne garentís es competéncies, es recorsi e era autonomia entà ordenar, governar e gerir es ahèrs publics e es interèssi generaus deth sòn territòri”.

 

Entre d’autes mesures, aquera proposicion de lei que fixe es competéncies deth Conselh Generau d’Aran e que crèe ua comission bilaterau entre es govèrns d’Aran e de Catalonha. Era lei que consolide era oficialitat dera lengua occitana en tot eth Principat de Catalonha, qu’establís qu’eth budget deth govèrn catalan e deu includir un hons de cooperacion damb eth govèrn aranés e que garentís qu’Aran “non pòt èster includit en cap de division territoriau ne administratiua que non sigue eth madeish”.

 

 

Proteccion des institucions araneses dauant era lei catalana de govèrns locaus

 

Eth deputat aranés qu’avertic tanben qu’era lei de racionalizacion e sostenibilitat dera administracion locau (LRSAL) ei “ua menaça entàs nòsti 700 ans d’istòria” e qu’aquera naua lei d’Aran que gesserà deth Parlament de Catalonha deu ajudar entà qu’era LRSAL “non abolisque” eth Conselh Generau d’Aran. Aguesta lei auie ja desvelhat maufisances en Unitat d’Aran, principau partit dera oposicion ena institucion maximala der autogovèrn aranés. 

 

 

 

FM

[Image: © Convergència i Unió - poblejat dins www.jornalet.com]